Xəbər verdiyimiz kimi mayın 21-i, axşam saatlarında Avropa Parlamenti Azərbaycanda həbs edilən erməni diversantları ilə bağlı qətnamə qəbul edib. Qətnamədə diversantlar "hərbi əsirlər" adlandırılıb və Azərbaycan hökumətindən onların qeyd-şərtsiz azad edilməsi tələb edilib. Milli Məclisin sədri Sahibə Qafarova parlamentin ayın 21-də keçirilən iclasında məsələyə münasibət bildirib. Spiker bildirib ki, sözügedən sənəddə əks olunan məlumatlar tamamilə saxtadır və həqiqəti əks etdirmir. Eurasia Diary portalı məsələ ilə əlaqədar Milli Məclisin beynəlxalq münasibətlər və parlamentlərarası əlaqələr komitəsinin üzvü Cavanşir Feyziyevin mövqeyini öyrənib.
Cavanşir müəllim, Avropa Parlamentinin məlum qətnaməsinin Azərbaycan və Avropa İttifaqı münasibətlərinə nə kimi təsir edəcəyi gözlənilir?
- Bugünlərdə Avropa Parlamentində qəbul edilmiş qətnamə Avropada fəaliyyət göstərən erməni diasporunun və Avropa Parlamentində erməni maraqlarına xidmət edən bir sıra deputaların təşəbbüsü ilə irəli sürülüb və müzakirə edilərək qəbul olunub. Qətnamənin ilkin layihəsində Azərbaycan əleyhinə absurd ittihamlar irəli sürülmüşdü, lakin aparılan müzakirələr və məsləhətləşmələr zamanı bunların bir qismi çıxarıldı. Lakin qətnamənin son mətni yenə də obyektivlikdən uzaq və qərəzlidir. Bütün bunlara baxmayaraq, hesab edirəm ki, sözügedən qətnamənin qəbulu bölgədəki mövcud vəziyyətə hər hansı formada təsir edə bilməyəcək. Azərbaycan işğalda olan torpaqlarını azad etməsi ilə artıq regionda artıq yeni reallıq yaradıb və heç bir qüvvə bu reallığı dəyişmək iqtidarında deyil.
Bu baxımdan Ermənistan Azərbaycana qarşı hər hansı təzyiq və qarayaxma kampaniyası aparmaq əvəzinə, qonşu dövlətlərlə, o cümlədən, Azərbaycanla münasibətləri normallaşdırmağa çalışması onlar üçün daha faydalı olardı. Təəssüflər olsun ki, erməni siyasətçilər beynəlxalq təşkilatlara yalan və saxta məlumatlar ötürməklə, Azərbaycana qarşı təzyiq kampaniyasını gücləndirməyə çalışırlar ki, bu da onların maraqlarına qətiyyən uyğun deyil. Bu, eyni zamanda Avropa İttifaqının da maraqlarına uyğun deyil, çünki Avropa İttifaqı hökuməti, yəni, Avropa İttifaqının özü, Azərbaycanla əməkdaşlığı dərinləşdirməkdə maraqlıdır. Bu da Avropa İttifaqı ilə Azərbaycan arasında bağlanmış müqavilələrə, hazırda müzakirə olunan beynəlxalq səviyyəli irimiqyaslı layihələrə əsaslanır. Avropa İttifaqının Cənubi Qafqaz bölgəsində ən çox iqtisadi əməkdaşlıq etdiyi ölkə Azərbaycandır. Eyni zamanda Avropa İttifaqı Azərbaycan üçün ən böyük ticarət tərəfdaşıdır. Bu baxımdan Avropa Parlamenti tərəfindən Azərbaycana qarşı qəbul edilən qətnamə Azərbaycanla Aİ arasında siyasi, iqtisadi, mədəni münasibətlərin hər hansı formada zədələnməsinə gətirib çıxarmayacaq. Ona görə də biz bu kimi qətnamələri sifarişli hesab edirik və onları “kağız parçası” adlandırırıq.
- Bəs Avropa Parlamentinə Milli Məclis tərəfindən rəsmi etiraz bildiriləcəkmi?
- Bu məsələyə Milli Məclis səviyyəsində hələ sözgedən qətnamə qəbul edilməmişdən öncə münasibət bildirilmişdi. Avropa Parlamentində Cənubi Qafqaz Ölkələri ilə Əməkdaşlıq Komitəsinin həmsədri ilə mənim onlayn görüşüm olub. Həmin görüşdə Avropa Parlameni tərəfindən Azərbaycana qarşı irəli sürülən və bizi narahat edən əsassız iddialar haqqında kifayət qədər geniş fikir mübadiləsi aparmışıq. Avropa Parlamentinin bu qətnaməsi ciddi siyasi əhəmiyyət daşımadığına görə, bu barədə Milli Məclisdə xüsusi müzakirələr açmağa lüzum görmürük. Çünki sözügedən sənədin nə Azərbaycan parlamenti və hökumətinə, nə də Avropa İttifaqının fəaliyyətinə hər hansı bir təsiri yoxdur.
Şəlalə Göytürk