Xəbər verdiyimiz kimi, Azərbaycan Milli Məclisinin nümayəndə heyəti Şimali Kipr Türk Respublikasına səfər edəcək. Milli Məclisin beynəlxalq əlaqələr komitəsinin rəhbəri, AŞPA-dakı Azərbaycan nümayəndə heyətinin başçısı Səməd Seyidovun rəhbərlik etdiyi heyət Şimali Kiprə yola düşür.

Səfərdən öncə Türkiyə Böyük Millət Məclisinin xarici əlaqələr komitəsinin rəhbəri Akif Çağatay Kılıc Səməd Seyidovun rəhbərlik etdiyi ilə heyətlə görüşüb. Türkiyə KİV-ləri xəbər verir ki, Kılıc Azərbaycan Milli Məclisinin nümayəndə heyətinin Şimali Kiprə səfərini “tarixi” adlandırıb.

 “Bu, Azərbaycan parlamentinin nümayəndə heyətinin Şimali Kiprə ilk tarixi səfəridir. Nümayəndə heyəti Şimali Kiprin azad olunmasının 47-ci ildönümü ilə bağlı keçirilən tədbirlərə qatılacaq və daha sonra iyulun 20-də Sülh və Barış günü tədbirlərində iştirak edəcək. Mərasimdə Türkiyə dövlət başçısı da iştirak edəcək. Biz bu mühüm addıma görə minnətdarıq. Bu, dünyaya mesajdır və Azərbaycan-Türkiyə qardaşlığının növbəti nümayişidir”, - Kılıc deyib.

Mövzuyla bağlı Şimali Kipr Türk Respublikası parlamentinin deputatı, Milli Birlik Partiyasının nümayəndəsi İzlem Gürçağ Eurasia Diary-ə eksklüziv müsahibə verib:

- Azərbaycan parlament nümayəndələrinin Şimali Kipr Türk Respublikasına (ŞKTR) ilk tarixi səfərini necə qiymətləndirirsiniz?

- Əvvəlcə onu bildirim ki, bizlər, yəni, Şimali Kipr və Azərbaycan türkləri eyni millətin övladlarıyıq. Bu günlərdə millət vəkilləri səviyyəsində qardaş Azərbaycan Respublikasının nümayəndə heyətinin türk Kiprinə edəcəkləri ilk rəsmi səfəri çox yüksək qiymətləndirir və bunun beynəlxalq aləmdə ciddi rezonansa səbəb olacağını düşünürəm. Çünki bu səfər Şimali Kipr ilə Azərbaycan arasındakı dostluq-qardaşlıq münasibətləri baxımından yeni bir dövrün başlanğıcı olacaq.

- Şimali Kipr ilə Azərbaycan arasında gələcəkdə münasibətlər hansı səviyyədə inkişaf edə bilər?

- Türk xalqlarının və türk dünyasının bir parçası olaraq Azərbaycan və ŞKTR hər zaman, istənilən şəraitdə bir və bərabər olmalıdır, olacaqdır. İki dövlətin və iki xalqın qarşılıqlı əlaqələrinin inkişaf etdirilməsi üçün qarşımıza çıxa biləcək bütün maneələri və çətinlikləri aşa biləcəyimizə inanıram və bu inancım paylaşdığımız ortaq dəyərlər və soykökümüzdən gəlir. Odur ki, gələcəyə doğru atacağımız addımlar siyasi və mədəni bağlarımızı daha da gücləndirməli, iqtisadi əməkdaşlığın təməlləri atılmalı, dövlətlərimizin daha da yaxınlaşması üçün mümkün olan bütün tədbirlər həyata keçirilməlidir.

- Azərbaycanlı millət vəkillərinin ilk rəsmi səfərindən sonra digər dövlət nümayəndələrimizin Türk Kiprinə səfərini gözləyirsinizmi? ŞKTR-nin müstəqilliyi Azərbaycan tərəfindən tanına bilərmi?

- Qeyd etdiyimiz kimi, məqsədimiz də budur və bu yolda qarşımıza çıxan hər maneəni iki xalq, iki dövlət olaraq həmrəy şəkildə aşacağımıza inanıram. Azərbaycanlı millət vəkillərinin sözügedən rəsmi səfəri gələcəkdə dövlət başçıları səviyyəsində keçiriləcək görüşlərin və nəhayət dövlətimizin müstəqilliyinin Azərbaycan tərəfindən tanınmasının ayaq səsləridir.

Nicat İsmayılov