4 iyun 2021-ci il - Azərbaycanın Kəlbəcər rayonu ərazisində yerləşən Susuzluq kəndi yaxınlıqlarında baş verən mina partlayışı nəticəsində Azərbaycan Televiziyasının operatoru Sirac Abışov və Azərbaycan Dövlət İnformasiya Agentliyinin müxbiri Məhərrəm İbrahimov həlak olub.
11 iyul 2021-ci il – İyulun 5-də Tbilisidə homofob qruplar tərəfindən digər jurnalistlərlə birlikdə döyülən Gürcüstanın “Pirveli” telekanalının operatoru Lekso Laşkarava iyulun 11-də öz yatağında ölü tapılıb.
15 iyul 2021-ci il – İyulun 8-də axşam saatlarında Hollandiyanın paytaxtı Amsterdam şəhərində küçədən keçərkən güllələnən Hollandiyanın məşhur jurnalisti və televiziya aparıcısı Pitr R.de Vrays vəfat edib.
16 iyul 2021-ci il – Reuters xəbər agentliyinin “Pulitzer” mükafatlı foto-müxbiri Daniş Siddiqi Əfqanıstanda hökumət qüvvələri ilə Taliban arasında gedən döyüşləri çəkərkən Taliban tərəfindən açılan atəş nəticəsində həyatını itirib.
Bir ay ərzində dünyanın müxtəlif ölkələrində jurnalistlərə qarşı sui-qəsdlərin tərtib edilməsi beynəlxalq səviyyədə jurnalist təhlükəsizliyi problemini aktuallaşdırıb. Mövzuyla bağlı Beynəlxalq Avrasiya Mətbuat Fondunun prezidenti, Mətbuat Şurasının sədr müavini Umud Mirzəyev öz fikirlərini Eurasia Diary ilə bölüşüb.
“Ümumiyyətlə, jurnalist peşəsi çox riskli və məsuliyyətli peşədir. Jurnalistlər insan hüquqları və söz azadlığının əsas keşikçiləridir və çox zaman da onlara qarşı təzyiq və zorakılıqlar buna görə həyata keçirilir. Təəssüflər olsun ki, jurnalistlərə qarşı törədilən qətllər və onların konflikt zonalarında öldürülməsi yeni deyil. Bəzən il ərzində 100-ə yaxın jurnalistin həyatının itirməsi ilə nəticələnən insidentlər baş verir. Lakin bu hadisələrin son dövrlər ardıcıl surətdə baş verməsi bizi həyacanlandırmaya bilməz” – deyə U.Mirzəyev bildirib.
U.Mirzəyev jurnalistlərin təhlükəsizliyinə qarşı sadəcə dövlətlərin deyil, vətəndaş cəmiyyəti insitutlarının da daha həssas və diqqətli yanaşmalı olduğunu bildirib: “Vətəndaş cəmiyyəti institutları, yerli təşkilatlar jurnalistlərin təhlükəsizliyinin qeydinə qalmalıdır. Çünki jurnalistlər birbaşa onlar üçün, vətəndaş üçün xidmət göstərir. Həmçinin jurnalistlərin təhlükəsizliyinin təmini üçün yerli və beynəlxalq təşkilatlar sıx əməkdaşlıq etməlidir. Onlara qarşı təzyiq, zorakılıq və qətl halları baş verdikdə yerli cəmiyyət və müvafiq beynəlxalq qurum məsələyə ortaq reaksiya verməli, səslərini ucaltmalıdır”.
Nicat İsmayılov