Xəbər verdiyimiz kimi Azərbaycan Respublikası Prezidenti İlham Əliyevin sərəncamı ilə general-leytenant Vəliyev Kərim Tofiq oğlu Azərbaycan müdafiə nazirinin müavini-Şəxsi Heyət Baş İdarəsinin rəisi vəzifəsindən azad edilərək müdafiə nazirinin birinci müavini - Azərbaycan Ordusunun Baş Qərargah rəisi təyin edilib.
Qeyd edək ki, daha öncə Baş Qərargah rəisi general-polkovnik Nəcməddin Sadıkov olub. O, 1993-2020-ci illərdə bu postda olub.
Bəs yeni Baş Qərargah rəisi Kərəm Vəliyev kimdir?
Azərbaycan Silahlı Qüvvələrinin Baş Qərargah rəisi təyin edilən Kərim Vəliyev müdafiə nazirinin müavini kimi ictimaiyyətə tanışdır. Lakin onun keçdiyi hərb yolu cəmiyyətdə maraq doğurur.
Bu vəzifədən öncə Müdafiə Nazirliyinin Şəxsi Heyət Baş İdarəsinin rəisi və müdafiə nazirinin müavini vəzifələrini icra edən general-leytenant Vəliyev Kərim Tofiq oğlu 9 fevral 1961-ci ildə Bakı şəhərində anadan olub.
O, 1982-ci ildə Bakı Ali Ümumqoşun Komandirlər Məktəbini fərqlənmə ilə bitirib. 1982–1990-cı illərdə SSRİ Silahlı Qüvvələri tərkibində kursant taqım komandiri, tədris şöbə rəisinin köməkçisi, tədris şöbə rəisinin baş köməkçisi vəzifələrində xidmət edib. 1990–1994-cü illərdə Frunze adına Hərbi Akademiyada qiyabi təhsil alıb.
1992-ci ildən Azərbaycan Respublikası Silahlı Qüvvələrində tədris şöbə rəisinin müavini, briqada komandiri, cəbhə komandanının müavini, Müdafiə nazirinin döyüş əməliyyatları üzrə müavini, ordu korpusu komandiri, Hərbi Elmi Mərkəzin rəisi, Müdafiənin Planlaşdırılmasının Hərbi Strategiyası İdarəsinin rəisi vəzifələrində xidmət edib.
Azərbaycanın suverenliyi və ərazi bütövlüyü uğrunda gedən döyüş əməliyyatlarında iştirak edib.
Prezident İlham Əliyevin sərəncamı ilə 1994-cü ildə "Azərbaycan Bayrağı" ordeni, 2005-ci ildə "Vətən uğrunda" medalı və 2012-ci ildə "Hərbi xidmətlərə görə" medalı ilə təltif olunub.
2014-cü ildə Müdafiə nazirinin şəxsi heyət üzrə müavini — Şəxsi Heyət Baş İdarəsinin rəisi vəzifəsinə təyin edilib.
Vətən Müharibəsində şəxsən iştirak edən general “Zəfər” ordeni, Ağdamın, Qubadlının və Cəbrayılın azad olunmasına görə medalları ilə təltif edilib.
Kərəm Vəliyevin Baş Qərargah rəisi təyin edilməsi və orduda gözlənilən digər təyinatlar barədə hərbi ekspert Ədalət Verdiyev Eurasia Diary-ə eksklüziv açıqlama verib:
“General-leytenant Kərəm Vəliyev həm birinci, həm də ikinci Qarabağ-Vətən Müharibəsində əlində silah əsgərlərinin önündə döyüş yollanan azsaylı generallarımızdan biri olub. İstər orduda hazırda xidmətdə olan, istərsə də ehtiyata çıxmış zabitlərimizdən demək olar ki, heç biri Kərəm Vəliyev haqqında mənfi bir fikir söyləməyib. Öz xidmət yoldaşları və tabeçiliyində olan zabitlər arasında şəxsi nüfuzu və hörməti ilə seçilən generallarımızdan biridir. Ona görə də mən bu təyinatın çox uğurlu olduğunu düşünürəm. Vətənimizə, millətimizə xeyirli olmasını diləyirəm”-deyə ekspert qeyd edib.
“Təbii ki, orduda başqa yeni təyinatlar da gündəmdədir. Müdafiə nazirinin şəxsi heyət üzrə müavini postuna Kərəm Vəliyevdən sonra yeni bir kadr gətiriləcək. Eyni zamanda Quru Qoşunları Komandanlığnın yaranması da ehtimal edilir. Mən bir çox zabitlərimizin Vətən Müharibəsindəki şücaətlərinə görə irəli çəkiləcəkləri fikrindəyəm, lakin onların konkret adlarını çəkə bilmərəm. Sadəcə, Əhaliddə Ümumqoşun Ordusunun komandanı, general-polkovnik Kərəm Mustafayevin yeni bir vəzifə alacağını deyə bilərəm, lakin bu da mənim şəxsi fikrimdir.” – deyə Ə.Verdiyev şəxsi proqnozlarını bizimlə bölüşüb.
Nicat İsmayılov