EDNews.net məşhur azərbaycanlı rəssam Lətafət Hafiz qızı Məmmədova ilə eksklüziv video müsahibəni təqdim edir.
Qarabağ mövzusu hər zaman mənim üçün çətin və ağrılı olub. Mən şəhidlərin xatirəsi və ailələri qarşısında baş əyirəm. Hər bir şəhidə görə göz yaşı axıtmışam. Onlar bizim ləyaqətimizi özümüzə qaytardı. Prezident İlham Əliyevə, eləcə də Rəcəb Tayyib Ərdoğana təşəkkür edirəm.
Mən rəssam Hafiz Məmmədovun ailəsində anadan olmuşam. O, Sovet realizm məktəbinin nümayəndələrindən idi. Böyük Vətən müharibəsində Stalinqrad və Berlin uğrunda döyüşlərin iştirakçısı olub. O çox yaxşı insan, ailə başçısı və ata idi. Məni şəxsiyyət kimi yetişdirdi. Evin divarlarında şəkil çəkirdim, deyirdi qoy çəksin, o rəssam olacaq. Gözümü açandan palitra, malbert, tablolar görmüşəm. Hazırda da atamın emalatxanası mənimçün müqəddəs yerdir. Uşaqlığım, gəncliyim orada keçib. Əslində keçmişlə yaşayan adam deyiləm, amma orada saatlarla otura bilərəm.
Rəssamlıq təhsilimi İnşaatçılar prospektində yerləşən Rəssamlar Evindən başladım. Daha sonra Pionerlər Evinə getdim. İnstitutu qımızı diplomla bitirdim və mənə orada qalıb işləməyi təklif etdilər.
Rəssam üçün peşəkarlıq baxımından təhsil almaq vacibdir. Bu, çox istedadlı insanlara nisbətən az lazım olur, ancaq rəssam daim inkişaf etməli, öz üzərində çalışmalıdır. Bu sənət böyük zəhmət tələb edir.
Hər sərgidən qabaq həyəcanlı oluram. Sevmədiyim əsərimi sərgidə nümayiş etdirmirəm. Ən sevimli əsərlərim sonuncu seriyadan olanlardır. Abşeron seriyasını çox sevirəm. Abşeronun qoxusuna, neft qüllələrinin mənzərəsinə, qumsallığına məftunam.
Daha ətraflı video müsahibədə:
Cəmilə Çebotareva