Türkiyənin Antalya, Adana, Mersin, Muğla, Osmaniyə və Kayseri şəhərləri daxil olmaqla bir neçə bölgəsində baş verən meşə yanğınları ölkəni qalın dumana bürüyüb. Çox sayda canlının tələf olduğu, o cümlədən yaşayış məntəqələrini sürətlə bürüyən yanğın qısa zamanda yayılaraq əsas yolların qapanmasına səbəb olub. Hadisə yerinə çoxlu sayda texnika, helikopter və təyyarələr cəlb olunsa da, güclü əsən küləklər nəticəsində yanğının qarşısını almaq hələ də mümkün olmayıb.
Qeyd edək ki, ötən gün hadisə ilə bağlı bir neçə PKK-lı olduğu şübhəli bilinən şəxslər saxlanılıb. Bu barədə Türkiyənin DHA (Demirören Haber Ajanlığı) xəbər agentliyi də məlumat yayıb. Qeyd olunur ki, PKK terrorçu qruplarından olan bir neçə dəstə sivillər arasına sızaraq, müxtəlif ərazilərdə planlı şəkildə yanğın törədiblər. Saxlanılanlar barədə istintaq işləri davam edir.
Daxildə HDP, xaricdə isə Qərbdən ilham alan PKK indi də, bəşəriyyətə və ekologiyaya qarşı son həmləsini edir. Türkiyə mehmetçiyinə gücü yetməyən PKK cild dəyişərək insanlar arasına girib meşələri və canlıları məhv etməyə çalışır. Bəs görəsən PKK-nı terrorçu kimi tanımayan və ona dəstək verən HDP (Xalqların Demokratik Partiyası) bunun üçün məsuliyyət daşıyırmı? Bundan sonra hökumət PKK-ya qarşı hansı tədbirləri görəcək?
Euriasia Diary-yə müsahibə verən türkiyəli siyasi şərhçi Mehmet Babacan bu suallara aydınlıq gətirib.
- Türkiyənin Antaliya və digər böyük şəhərindəki irimiqyaslı meşə yanğınının səbəbləri barədə nə deyə bilərsiz? Xatırladım ki, Türkiyənin DHA xəbər agentliyi bu yanğınların terror hadisəsi olduğunu təsdiqləyib.
- Bildiyiniz kimi son bir neçə gündə Türkiyənin 21 şəhəri daxil olmaqla, Ögey və Aralıq dəniz bölgələrində meşə yanğınları intensiv hal alıb. Yanğınların söndürülməsində baş verən əngəllər insanları da dərin təşvişə salıb. Buna baxmayaraq bir çox şəhərlərdə yanğınları söndürmək mümkün olub və hazırda yalnız 7 şəhərdə yanğın davam etməkdədir.
Bunun terror hadisəsi olub-olmadığına gəlincə, rəsmi Ankara hadisə ilə bağlı araşdırma aparır və PKK-lı olduqları şübhəli bilinən şəxslər dərhal həbs olunaraq məhkəməyə verilib.
Əslində meşə yanğını terroru PKK-nın əvvəllər də Türkiyəyə qarşı tətbiq etdiyi mənfur planlarından olub. Bu səbəbdən rəsmi Ankaraya görə bu hadisənin PKK tərəfindən bir sabotaj olma ehtimalı daha böyükdür və araşdırmalar məhz PKK üzərində aparılır.
- Dünən meşə yanğınında şübhəli bilinən bir neçə PKK-lı şəxslərin həbs olunduğu bildirildi. Həmçinin yanğınların dörd fərqli istiqamətdən törədildiyi bu faktın terror olduğunu bir daha təsdiqləmiş oldu. Türk Mehmetciyinə gücü yetməyən PKK terroçuları indi də sivillər arasına sızaraqmı terror edirlər?
- Az öncə qeyd etdiyim kimi bir neçə şəxs axtarış tədbirləri nəticəsində həbs edilib. Həbs olunanlar arasında bir nəfərin PKK ilə bağlantısı olduğu təsdiqlənib. Şübhəli bilinən şəxs hazırda ev həbsi alıb və onun digər yanğınlarda barmağının olub-olmadığı, həmçinin PKK terrorçu qurpunda kimlərlə əlbir olması barədə araşdırmalar aparılır. Hesab edirəm bu barədə tezliklə dəqiq bir bilgi əldə ediləcəkdir.
Təbii ki, PKK son dönəmlərdə Türkiyə silahlı qüvvələrinin gücü qarşısında ciddi məğlubiyyətə uğrayıb. Bir çox düşərgələri və silah anbarları məhv edilən terror qrupunda ciddi silah-sursat və insan qaynağı problemi yaşanır. Deyə bilərəm ki, bu hadisəni törətməklə PKK sadəcə son çırpınışını ifadə edir.
- PKK-nın bu addımında ona yaxın olan HDP məsuliyyət daşıyırmı? Hadisədən sonra PKK-nı dəstəkləyən HDP məsuliyyətə cəlb oluna bilərmi?
- Əlbəttə HDP əvvəldən PKK-nı dəstəkləyən və onunla ilə sıx bağlı olan siyasi partiya olub. Lakin bu ən son meşə yanğınları ilə bağlı partiya mənsublarından hər hansı bir açıqlama əldə edilməyib. Hesan edirəm tətildən sonra yaxın günlərdə Türkiyə Milli Məclisində bu məsələ müzakirə ediləcək və HDP-nin bu hadisədə terror təşkilatı ilə hər hansı bir əlaqəsinin olması barədə araşdırmalara başlanacaq.
Sadəcə araşdırmalara başlanan zaman HDP-nin buna reaksiyasının necə olacağı daha böyük önəm daşımaqdadır. Xüsusilə Parlamentdə müzakirə zamanı HDP-li millət vəkillərinin hadisə barədə verəcəyi açıqlamalar, həmçinin PKK ilə bağlılıq çərçivəsində buna göstərəcəyi təpgi həllidici rola malikdir. Yəni bir sözlə yalnız onların verəcəyi açıqlama əsasında HDP-nin əl altdan PKK-nı dəstəklədiyi ortaya çıxa biləcək.
- Türkiyə dövləti bundan sonra PKK-ya qarşı nə kimi ciddi tədbirlər görəcək?
- Türkiyədə PKK-ya qarşı həm siyasi, həm də milli təhlükəsizlik sahəsində hərtərəfli mübarizə davam etdirilir. Son günlərdə İraqın şimalında yerləşən PKK-ya aid hərbi düşərgələri məhv edilib. Eyni zamanda Anadolunun cənub şərqində bir neçə hədəf bölgələrdə intensiv cavab atəşi nəticəsində PKK qüvvələri susdurulub. Bu gün əli hər şeydən üzülən PKK Türkiyə dövlətini terrorla təhdid etməyə başlayıb. Hesab edirəm bu kimi terrorlar türk xalqını sarsıtmayacaq, əksinə tədbirlər artırılacaq və PKK-nın sonunu gətirənə qədər davam etdiriləcək.
Elnur Ənvəroğlu