Türkiyə ikinci böyük qaçqın böhranı ilə üzləşib. Əfqanıstanda Taliban qüvvələrinin güclənməsi və hökumətin ölkədəki xaosla bacara bilməməsi əhalinin öz doğma yerlərini tərk edib başqa ölkələrdə sığınacaq axtarmasına səbəb olub. Əvvəl qonşu ölkələr olan Türkmənistan, Özbəkistan, Tacikistan, o cümlədən İrana sığınan əfqan qaçqınları, son dönəmdə kütləvi olaraq Türkiyəyə üz tutmağa başlayıb. Bir tərəfdən ölkədəki iqtisadi sıxıntı, digər tərəfdən qeyri-qanuni yollarla axın-axın ölkəyə girməyə çalışan qaçqınlar Türkiyəni sərt tədbirlər görməyə məcbur edir.
Xatırladaq ki, Türkiyə son dövrlər milyonlarla qaçqın üçün qapısını açıb. Suriyadakı vətəndaş müharibəsindən sonra sığınacaq axtaran minlərlə şəxs Türkiyəyə üz tutmağa başladı. Onların arasında həqiqi qaçqınlarla yanaşı, təxribat məqsədilə ölkəyə keçən İŞİD üzvləri də vardı. Məhz bundan sonra Türkiyə daxildən terror təhdidlərinə məruz qaldı.
Bu gün də eyni ssenari yaşanmaqdadır və maraqlısı budur ki, Əfqanıstanın daha çox kişilərdən ibarət qaçqın izdihamı İran ərazisindən Türkiyəyə daxil olmağa çalışır. Bir çox mənbələr də onların arasında Taliban casuslarının ola biləcəyi ilə bağlı xəbərdarlıq edir. Yəni, əgər qarşısı alınmasa, yaxın müddətdə Türkiyəni çox ağır günlər gözləyə bilər. Türkiyəli siyasi şərhçi İrfan Kaya Ülgər baş verən hadisələr və ölkəni təhdid edən təhlükələrlə bağlı Eurasia Diary-yə müsahibə verib.
