Bu gün Qarakənd faciəsindən 30 il ötür. EDNews.net xəbər verir ki, həmin hadisə zamanı şəhid olan Milli Qəhrəman, telejurnalist Alı Mustafayevin oğlu Tural Mustafayev Moderator.az-ın əməkdaşıyla söhbəti zamanı öz fikirlərini bölüşüb. O, Qarakənd faciəsinin dövlət səviyyəsində diqqətdə saxlanılmasının arzusunda olduğunu bildirib:
“Təəssüratım odur ki, Qarabağ azad olunub, artıq başımız dik gəzirik. Qarakənd faciəsində həlak olanlar sülh yolu ilə bu məsələni həll etmək istəyirdilər, ancaq erməni vandalizmi buna imkan vermədi. İndi isə artıq 30 il tamam olub və Azərbaycan əsgəri öz qanı bahasına bu torpaqları azad edib. Vətən sağ olsun. Arzum odur ki, dövlət səviyyəsində bu məsələ diqqət mərkəzində saxlanılsın və Qarabağın azad olunması tarixi silsiləsinə Qarakənd faciəsi də daxil edilsin”.
Qeyd edək ki, A.Mustafayev 1952-ci il aprelin 14-də Qazaxın Qazaxbəyli kəndində fəhlə ailəsində anadan olub. A.Mustafayev Birinci Qarabağ savaşı zamanı qaynar nöqtələrdən, eləcə də yüksək dövlət səviyyəli rəsmi görüşlərdən hazırladığı müsahibə və reportajlarla rəğbət qazanıb. O, 1989-1990-cı illərdə Moskva şəhərində Azərbaycan Respublikası Ali Məclisi tərəfindən parlament müxbiri olub. O, 1991-ci il noyabrın 20-də Xocavənd rayonunun Qarakənd kəndinin yaxınlığında, Ağdam rayonunun Mərzili kəndi ərazisində erməni hərbiləşdirilmiş dəstələri tərəfindən vurulan Azərbaycan hərbi helikopterində həlak olub. Ölümündən sonra Alı Mustafayevə Azərbaycan Respublikası Prezidentinin 6 noyabr 1992-ci il tarixli 294 saylı fərmanı ilə Azərbaycanın Milli Qəhrəmanı fəxri adı verilib. Nərimanov rayonunda 202 saylı orta məktəb və bir gəmi onun adını daşıyır.
