Son vaxtlar Rusiyada baş verənlər iğtişaşlar, prosesslər, qismən səfərbərlik elanı gündəmdə yerini qorumaqdadır. Baş verən hadisələr Azərbaycana da təsirini göstərəcəkmi?
Ednews bu barədə deputat və politoloqların fikirlərini öyrənib.
Deputat Fazil Mustafa düşünür ki, Rusiyada baş verənlər Azərbaycana ciddi təsir göstərəcək.
“Rusiyada çox sayda yaşayan azərbaycanlıların iqtisadi və sosial vəziyyəti ağırlaşacaq. Onların bir qismi ölkəmizə qayıda bilər. Onlar müəyyən qədər vətəndə yaşayan ailələrinə kömək edir, dəstək olurdular. Bu problemlər artacaq. Hər halda arzulanan deyil, azərbaycanlıların orada rifah içində yaşaması bizim üçün də məqbul idi. Rusiyanın özün də məhdudlaşması, sanksiya altında qalması ordakı iş adamlarımıza da böyük zərbə vurur. Heç kim bunu arzulamaz ki, narahatçılıqlar yaşansın. Bu çətinliklər müharibənin yaratdığı şərtləri, bəzi məsələləri diqtə edir. Ümid edək ki, bu istiqamətdə proses uzun çəkməz və soydaşlarımız ən azı az zərərlə bu məsələdən çıxarlar. Hər halda bu bizim üçün ağır nəticələri ola biləcək qərardı və Rusiyanın çətinlik içində olması, yoxsullaşması Azərbaycana əhəmiyyətli təsirini gösətərəcək. Çünki Rusiya bizim üçün əsas bazarlardan biridir. Bunu itirmək, sıxıntı yaşamaq bizim işimizə yaramır, maraqlamırıza uyğun deyil”.
Politoloq Turab Rzayev bildirib ki, Rusiyada baş verən çaxnaşmaların nə qədər geniş yayılacağı, nə qədər çox saylı olacağı geniş ərazini əhatə edəcəyidir.
“İndiki halda bu sadəcə müharibədən qaçan, çağırışçı olmaq istəməyən və yaxud iştirak etmək istəməyən gənclərin sərhəddən qaçışı şəklində müşahidə olunur. Gürcüstan sərhəddinə minlərlə insan toplanıb. Rusiyadakı azərbaycanlıların böyük hissəsi vətənə qayıtmaq istəyəcəklər. Əgər iğtişaşlar böyüməsə təsiri bundan ibarət olacaq, əksi olarsa, yəni daha genişmiqyaslı vüsət alarsa, o zaman Rusiyanın özündə də böyük dəyişikliklər baş verə bilər. Məsələn, Rusiyada ənənəvi olaraq, Efes-B və ordu qarşıdurması var, istənilən halda səfərbərliyin edilməsi ordunun gücünü cəmiyyətdə artırır. Əgər tam səfərbərliyə keçirilərsə, onda ordunun nüfuzu daha da artacaq. Bu Rusiyada 90-cı illərdən bəri dövləti idarə edən Efes-B qruplaşmasının məğlubiyyəti ilə nəticələnə bilər. Ordunun dövləti nəzarətə alması ilə nəticələnə bilər. Proseslər Rusiyanı zəiflətməyə doğru aparır”.
Politoloq Elxan Şahinoğlu qeyd edib ki, Rusiyadakı səfərbərliyin və Rusiya-Ukrayna müharibəsinin Azərbaycana təsiri o ola bilər ki, Rusiya səfərbərlik elan edibsə, orda müxtəlif millətlərin nümayəndələrini də müharibəyə cəlb edəcək .
“Əgər orda yaşayan, Rusiya vətəndaşı olan azərbaycanılar da savaşa cəlb oluna bilər. Amma bu yanlışdır. Ona görə də onların vətənə qayıtma məsələsi də var. Amma bu da artıq çətinləşib. Çünki quru yolla Azərbaycana qayıtmaq hələki mümkün deyil, sərhədlər bağlıdır. Rus gəncləri özləri də müharibədən yayınmaq üçün müxtəlif ölkərə qaçırlar, onlar İstanbul, İrəvan, Bakı kimi ölkələrə üz tuturlar. Neçə ayın biletləri artıq alınıb. Bu cür çətinliklər Azərbaycanda da yaşana bilər”.