Bu günlərdə “Əqrəb mövsümü” serialı gündəmdən düşmür. Seriala yazılan rəylər kifayət qədər çoxdur. Ekran əsərində Elnarə rolunu canlandıran aktirsa ilə maraqlı söhbət etdik.
Ednews tanınmış aktrisa Zülfiyyə Qurbanova ilə müsahibəni təqdim edir.
- Seriala necə seçildiniz?
- Emil (rejissor Emil Quliyev. red) bəylə hər dəfə istər film təqdimatlarında, istərsə də televiziya verlişlərində üz-üzə gələndə o mənə deyirdi ki, sizlə işləmək istəyirəm. Mütləq bir gün işləyəcəm deyirdi. Təbii ki, mən də onunla işləmək istəyirdim. Emil rejissor kimi peşəkardır. Çəkdiyi bütün işlər gözəl nəticəsini verib. Bu istək məndə də vardı. Bir gün mənə təklif etdi ki, serial çəkirəm və sizi serialımda görmək istəyirəm. Söhbətlərimiz, müzakirələrimiz oldu. Mənə ssenari verildi, oxudum. Sonra analiz etdik. Məşqlərimiz oldu və seriala çəkildim.
- Başqa aktrisalar vardımı sizin rolunuz üçün?
- Açığı bu rola hansısa aktrisanın olub-olmadığını bilmirəm. Səmimi desəm, bu heç bir zaman mənə maraqlı olmayıb.
- “Əqrəb mövsümü” serialı demək olar ki, gündəmdən düşmür. Əksəriyyət müsbət rəylər yazır. Əvvəlcə, təəssüratlarınızı öyrənmək istərdik. Bu qədər xoş rəyləri gözləyirdiniz?
- Rəylərdən xəbərim var. İzləyənlər müsbər fikirlərini yazırlar, paylaşırlar. Bu məni sevindirir. Təvazökarlıqdan uzaq olsaq, açığı gözləyirdim bu cürə reaksiyaları. İş peşəkar işi idi. Aktyor heyəti peşəkar idi. Ümumiyyətlə, serialda çalışan hər kəs istər kamera önündə, istərsə də kamera arxasında olanlar peşəkar olduğundan belə rəyləri gözləyirdim.
- Sizcə, seiral Azərbaycan cəmiyyətindəki ailə problemlərini qabarda bilibmi?
- Düşünürəm ki, serial cəmiyyətimizdə olan ailə problemlərinin bir qismini işıqlandıra bilib. Çünki cəmiyyətdə bir çox hadisələrlə qarşılaşırıq. Ailələrin daxilində kifayət qədər problem olur. Biz bəzən buna göz yumuruq. Guya görmürük, yaxud da üstünü basdırmağa çalışırıq. Bizə toxunmadığına görə biganə yanaşırıq. Amma, film serial çox hallarda bunu çılpaqlığı ilə ifadə edir, göstərir. Tamaşaçılar belə hallarda düşünürlər ki, bu lazım deyil. Məncə isə lazımdır. Ailərdə daha dərin problemlər olur. Sadəcə insanlar olan şeyləri bəzən qəbul etmək istəmirlər. Çünki qəbul etsələr gördüklərini hiss etdirsələr bəzi şeylərlə yaşamaq çox çətindir.
- “Əqrəb mövsümü” Azərbaycan kinosuna yeniliklər gətirəcəkmi?
- Serial kifayət qədər Azərbaycan kinosuna yeniliklər gətirəcək. Artıq bu yolda cığırı açıb. Serialı izləyəndə onun bir serial olduğunu unuduram. Film tərzində baxıram. Çünki film kimi çəkilib. Azərbaycanda alışdığımız serial tərzi var. “Əqrəb mövsümü” o tərzdən çıxıb. Peşəkar film xəttilə gedir. Dünya arenasında olan filmlər tərzində çəkilib.
- Sonda serial neçə seriya davam edəcək və tamaşaçıları hansı sürprizlər gözləyir?
- İzləyən tamaşaçılar da bilir ki, mən 8-ci seriyadan “Əqrəb mövsümü”ndən ayrılmışam. Rolunu oynadığım qadının obrazı artıq serialda ölüb və mənim xəttim də bitib. Serial 12 bölümlükdür. İnşallah davamı olacaq. Bu haqda məlumat verə bilmərəm. (gülür) Çünki bu peşəkar bir sirrdir. Serialın gedişatı, ssenarisi ilə bağlı nəsə deməyə mənim ixtiyarım yoxdur. Həm də bu doğru sayılmaz. Tamaşaçılar serialı izləsinlər. Gözəl gedişat var. Serial onsuz da kifayət qədər tamaşaçı tərəfindən sevildi. Uğur olsun!
Söhbətləşdi: Oğuz Ayvaz