Bu gün Azərbaycan jurnalistlərinin böyük müəllimi, bütün həyatını sözə və mətbuata həsr etmiş professor, Bakı Dövlət Universitetinin kafedra müdiri Cahangir Məmmədlinin ad günüdür. Onun 81 yaşı tamam olur.
Ednews bu münasibətlə Cahangir Məmmədli ilə ad günü söhbətini təqdim edir:
- Müəllim, ilk öncə ad gününüzü təbrik edirəm. Cahangir Məmmədli üçün doğum günü nədir?
- Çox ağır illərdə, 1942-ci ildə doğulmuşam. Anadan olandan on gün qabaq atam müharibəyə gedib, qayıtmayıb. Ondan altı ay sonra anam bu dərdə dözməyib, rəhmətə gedib. Məni qardaşlarım, bacılarım böyüdüb. Ona görə də mənim üçün ən əziz anlayış bacı-qardaş anlayışdır. İllər keçdi, böyüdük. İnsanın taleyi var. İnanın, bütün səmimiyyətimlə deyirəm, çox-çox ağır illər keçirtmişik, amma o ötən günlərin problemləri bu gün xatirələrimizdə əziz görünür. Elə bil ki, onlar olmasa idi insan kimi inkişaf etmək çətin olardı. Xatirələr insanın insan olmağına çox kömək edir.
- Adətən ad günlərini necə keçirirsiniz?
- 30 illik Qarabağ həsrətinin bitməsi, kəndimə qayıda bilmək imkanı ən böyük hədiyyə oldu mənə. İlk öncə Ulu Tanrıya, sonra Prezindetimiz İlham Əliyevə və onun ordusuna təşəkkür edirəm. Allah şəhidlərimizə rəhmət etsin. Ömrümün ən xoşbəxt anlarıdı ki, mən vətənimə qayıda bilmişəm. Ötən il ad günümü də Ağdamda, kəndimizdə qeyd etdim.
- Bakı Dövlət Universitetində ad gününüzü qeyd etdilər?
- Bəli, tədbir keçirildi. Bizim fakültənin bütün kollektivi dünyanın ən gözəl sözlərini ünvanıma söylədilər. Məni xoşbəxt etdilər. (gülür)
- Beynəlxalq Avrasiya Mətbuat Fondunun prezidenti Umud Mirzəyev başda olmaqla, bütün kollektiv ad gününüzü təbrik edir, sizə möhkəm can sağlığı arzulayır...
- Allah sizi var eləsin. Beynəlxalq Avrasiya Mətbuat Fondu, başda Umud müəllim olmaqla Azərbaycanda Ermənistan vandalizimini dünyaya tanıdan ikinci bir media formatı tanımıram. Umud müəllimlə bir sıra səfərlərdə olmuşam. Füzulidə və bir çox azad olunmuş torpaqlarda birgə səfərlərimiz olub. Onun qonaqlarını görümüşəm, dünyanın müxtəlif yerlərindən Nobel mükafatçısından tutmuş böyük ictimai şəxsiyyətlərə qədər hamsını Azərbaycana gətirib və ermənilərin vəhşiliklərini onlara göstərib. Umud müəllim Azərbaycan xalqının ən böyük vətəndaş oğullarından biridir.
- Bir daha təbrik edirik...
- Siz sağ olun ki, məni yada saldınız. Var olun!
Söhbətləşdi: Oğuz Ayvaz
