Ermənistandakı Aİ missiyasının gücləndirilməsi, əməkdaşların və patrulların artırılması barədə qərar qəbul edilib. Borrel: Aİ Bakıya xəbərdarlıq edib ki, Ermənistanın ərazi bütövlüyünün pozulması Brüssel və Bakı arasında münasibətlərin dəyişməsinə səbəb olacaq. Avropa İttifaqının Azərbaycana qarşı bu cür qərəzli çıxışı nəyə əsaslanır? Aİ-nin Ermənistanda olan mülki missiyanın əsas məğzi nədir?

Məsələ ilə bağlı politoloq Turab Rzayev Ednews-a açıqlamasında bildirib ki, Aİ-nin mülki missiyası hərbiləşdirilmiş  strukturdur:

“Avropa İttifaqının xarici işlər üzrə katibi Cozef Borrelin çıxışı ilə açıq şəkildə ortaya qoyuldu ki, Ermənistanın silahlandırılması iki tərəfində  Azərbaycana qarşı qərəzli mövqeyinə əsaslanır.

Çünki indiyə qədər Aİ-nin əsas missiyasının  sərhədlərdə müşaidə olduğu deyilirdi.

Hətta Paşinyan belə dekabra qədər Azərbaycanla sülh bağlayacağını vurğulayırdı. Digər tərəfdən Ermənistanın sürətli şəkildə silahlanması bizdə fərqli suallar doğurur. Bu çıxışda isə görürük ki, Avropa tərəfdən gələn mülki missiyanın əsas məqsədi başqaymış. Əslində bu “hərbi missiyanın” tərkibində Fransa jandarmaları və alman polisləri var. Yəni onlar hərbiləşdirilmiş strukturdur. Bu cür hərəkətlərlə Avropa İttifaqı açıq şəkildə anti-Azərbaycan siyasəti yürüdür. Həmçinin sonuncu mülki missiyanın da raporları bildirilməyib”.

Politoloq qeyd edib ki, Borrelin anti-Azərbaycan  mövqeyi və çıxışı əsassızdır:

“Lakin burda  iki əsas məqamı nəzərə almaq lazımdır.

Birinci olaraq Azərbaycanın Ermənistanın ərazi bütövlüyünə qarşı heç bir iddiası yoxdur. Ona görə də Borrelin  açıqlaması çox mənasız açıqlamadır.

Sanki Azərbaycan Ermənistanın ərazisinə hücum planlaşdırır və Avropa İttifaqı bunun qarşısını alır. Bu zaman həm Avropa İttifaqının Ermənistanın təhlükəsizliyindəki rolu şişirdilir, həm də  eyni zamanda Azərbaycan tərəfi ilə bağlı doğru olmayan məlumatlar verilir.

Onsuz Azərbaycanın bu məsələrlə bağlı heç bir iddiası yoxdur. Əsas olaraq Ermənistan düşünməməlidir ki, Avropa İttifaqının şişirdilmiş  dəstəyi ilə Ermənistan Qazaxın yeddi kəndə və Naxçıvanın Kərki kəndi olan Azərbaycanın anklavlar ərazilərinə yiyələnə biləcəklər”. 

Xəyal Ramiz