“Gürcüstan NATO-nun ən sadiq və etibarlı tərəfdaşlarından biridir”.
Bu sözləri Gürcüstanın baş naziri İrakli Kobaxidze Tbilisidə NATO-nun baş katibi Yens Stoltenberqlə görüşündən sonra keçirdiyi brifinqdə deyib. Onun sözlərinə görə, Tbilisi “Gürcüstanın işğal olunmuş ərazilərində baş verən hadisələrlə bağlı baş katibin vaxtında və ədalətli bəyanatlarını” yüksək qiymətləndirir. Baş nazir NATO-nun baş katibinə Gürcüstanı və onun “Avro-Atlantik istəklərini” dəstəklədiyinə görə təşəkkür edib. NATO baş katibinin Azərbaycana və əsasən də Gürcüstana səfərinin əsas səbəbləri nədir? NATO Gürcüstan və Azərbaycan üçün niyə belə narahat olur?
Məsələ ilə bağlı gürcü politoloq Gia Xuxaşvili Ednews-a açıqlamasında bildirib ki, Ukraynadakı müharibənin müəyyən qlobal ölçüsü var və bunun nəticəsində tamamilə yeni dünya nizamı formalaşacaq:
“Bu yeni dünyada bütün ölkələr öz yerini müəyyən etməli olacaqlar. Yəni sual ortaya çıxır ki onlar hansı təhlükəsizlik sisteminə qoşulacaqlar? Bu, NATO-nun strateji maraqlarını müəyyən edir. Azərbaycan dolayısı ilə bu təşkilatın üzvü olan Türkiyə, təbii ki, onların strateji maraqlarına uyğundur. NATO sisteminin mühüm tərkib hissəsi olan Avropa Birliyinin potensial üzvü kimi Gürcüstana marağa gəlincə, burada, fikrimcə, hər şey göz qabağındadır. Əlavə taktiki arqument kimi Qərblə Rusiya arasında qarşıdurmada mühüm rol oynayan Qara dəniz təhlükəsizlik sisteminin formalaşmasında Gürcüstanın əhəmiyyəti hesab oluna bilər”.
Gürcü politoloq heasb edir ki, bu prosesin nəticəsi qısamüddətli və ya orta müddətli olmayacaq:
“Hər kəs başa düşməlidir ki, bu yolda çoxlu xarici və daxili problemlər var. O cümlədən Gürcüstan dövlətinin bütövlüyü ilə bağlı qeyri-müəyyənlikləridə istisna etmək olmaz. Bundan əlavə, biz başa düşməliyik ki, NATO sadəcə hərbi deyil, hərbi-siyasi təşkilatdır. Bu istiqamətdə irəliləyiş əsasən Avropa İttifaqının bizim qarşımıza qoyduğu şərtləri yerinə yetirməkdən asılıdır. Gürcüstanın timsalında bu, bir növ sinxron prosesdir, burada Azərbaycandan fərqli olaraq NATO-ya gedən yol Avropa İttifaqına daxil olmaqdan keçə bilər”.
Xəyal Ramiz