Millət vəkili Qənirə Paşayeva AŞPA-da Azad Demokratlar Qrupu toplantısında Ermənistanın qeyri-qanunu girov saxladığı azərbaycanlı Dilqəm Əsgərov və Şahbaz Quliyevlə bağlı məsələ qaldırıb.
Millət vəkili AŞPA və Avropa İnsan Haqları Komissarının Dilqəm Əsgərov və Şahbaz Quliyevin azad olunması üçün Ermənistana ciddi təzyiq göstərməməsinə etiraz edib.
Q.Paşayeva təşkilatı onların pozulan insan haqlarının müdafiəsində daha fəal olmağa çağırıb:
“Dilqəm Əsgərov və Şahbaz Quliyevə edilən əziyyətlər və ailələrinin yaşadığı böyük üzüntü barədə məlumatlar verərək təmsil olunduğumuz qrupu da bu məsələni xüsusi diqqətdə saxlamağa çağırdıq. Bu məsələni Avropa İnsan Haqları üzrə Komissarı vəzifəsinə namizədlərin qrup üzvləri qarşısında çıxışı zamanı da xüsusi diqqət mərkəzində saxladıq. Onlara suallarımız zamanı bildirdik ki, hazırkı insan haqları komissarının bu məsələ ilə bağlı fəaliyyəti hiss olunmur və biz bundan çox narazıyıq”, - Q.Paşayeva media açıqlamasında bildirib.
Deputat çıxışında qeyd edib ki, Avropa insan haqları üzrə komissarı Dilqəm Əsgərov və Şahbaz Quliyevin azad olunması üçün heç bir ciddi addım atmayıb:
“Avropa insan haqları komissarı vəzifəsinə seçkilərdə səs verməzdən öncə hansı namizədin bu məsələlərə xüsusi diqqət yetirəcəyini bilmək istəyirik və mövqeyimizdə də bu məsələ xüsusi rol oynayacaq. Çünki yeni seçiləcək komissardan ikili standartlara yol vermədən Ermənistanın işğalçılığı üzündən evinə dönə bilməyən azərbaycanla qaçqın və məcburi köçkünlərin öz evlərinə dönməsi haqlarının ciddi müdafiə olunmasını, azərbaycanlı girovlar Dilqəm Əsgərov və Şahbaz Quliyevin azad olunması üçün ciddi səylər göstərməsini gözləyirik”.
