Milli Məclisin Səhiyyə komitəsinin sədri Əhliman Əmiraslanovun rəhbərliyi ilə bir qrup deputat və Milli Məclis Aparatının əməkdaşları Ankarada səfərdə olublar.
Səfər TİKA-nın (Türk İşbirligi və Koordinasyon Ajansı Bakanlığı) dəstəyi ilə qarşılıqlı təcrübə mübadiləsi proqramı çərçivəsində reallaşdırılıb.
Səfər çərçivəsində Azərbaycan nümayəndə heyətinin üzvləri Türkiyə Böyük Millət Məclisində, Türkiyə Sosial Müdafiə Fondunda, Ailə və Sosial Siyasət Nazirliyində, Ədliyyə Nazirliyi və Ailə Məhkəmələrində olub. Parlamentin nümayəndələri Türkiyə Böyük Millət Məclisində Səhiyyə, Ailə, Əmək və Sosial İşlər Komissiyası, Gender Bərabərliyi Komissiyasının üzvləri, Türkiyə-Azərbaycan Parlamentlərarası Dostluq Qrupunun rəhbəri və digər şəxslərlə görüşüblər. Görüşlər zamanı iki dost və qardaş ölkənin bütün sahələrdə olduğu kimi, qanun yaradıcılığı prosesində də əməkdaşlığının əhəmiyyəti vurğulanıb və qeyd olunub ki, gələcəkdə bu istiqamətdə işlər daha da inkişaf etdirilməli və sürətləndirilməlidir. Müzakirələr zamanı qanunvericilik sahəsində əməkdaşlığın vacibliyi önə çəkilib.
Milli Məclisin deputatları və Aparatın əməkdaşları səfər zamanı həmçinin Sosial Müdafiə Qurumunun rəhbərliyi ilə də görüşüblər. Görüş zamanı tibbi sığorta şöbəsi, pensiya xidmətləri şöbəsi, sığorta ödəmələri və sosial xidmətlər şöbəsinin rəhbərləri ilə görüşlərdə hər iki ölkənin qanunvericilik sahəsində mövcud qanunlar, həyata keçirilən islahatlarla bağlı fikir mübadiləsi aparılıb, hər iki tərəf təcrübələrini bölüşüblər.
Türkiyə Ədliyyə Nazirliyi və Ankara Ailə Məhkəmələrində də bir sıra görüşlər keçirilib. Görüşlərdə iki ölkənin nümayəndə heyəti məhkəmə sistemi və bu sahədə görülən işlər, ailə məhkəmələrinin yaradılması, işləmə mexanizmi və digər məsələlərlə bağlı geniş məlumat alıblar.
Səfərin sonunda nümayəndə heyətimiz dahi bəstəkarımız Üzeyir Hacıbəylinin “Leyli və Məcnun” operasının Ankara Opera və Balet Teatrı tərəfindən hazırlanmış tamaşasının nümayişində iştirak edib. Qeyd edək ki, Azərbaycan parlament nümayəndə heyətinin tərkibinə deputatlardan Əmək və Sosial siyasət komitəsinin sədri Hadi Rəcəbli, Məlahət İbrahimqızı, Sədaqət Vəliyeva və Sevinc Hüseynova daxil olub.