Eurasia Diary xəbər verir ki, Azərbaycan Baş nazirinin müavini, Dayanıqlı İnkişaf üzrə Milli Əlaqələndirmə Şurasının sədri Əli Əhmədov VI Bakı Beynəlxalq Humanitar Forumu çərçivəsində keçirilən Dayanıqlı İnkişafa dair Bakı Forumunda çıxış edib.
"Bu gün dünyada 1 milyarda yaxın insan aclıq, kasıblıq və iqtisadi geriliklər məngənəsində sıxılmaqdadır. Biz qarşıda duran 12 il ərzində bu vəzifəni həyata keçirməliyik ki, heç kim kənarda qalmasın. Gəlin yoxsulluq olmayan aclıq olmayan dünya quraq. Mən bu sözləri deyərkən gözümün önünə Azərbaycanın təcrübəsini gətirirəm. Azərbaycanda 13-15 il ərzində əldə olunan nailiyyətlər BMT-nin 2030-cu il Dayanıqlı İnkişaf Məqsədlərinə nail olmağa inam yaradır. Azərbaycan Respublikasının prezidenti Humanitar forumda bu haqda daha geniş məlumat verib. Azərbaycan bu illər ərzində ölkədə yoxsulluğu 50 faizdən təxminən 5 faizə qədər endirə bilib, ökədə 2 milyon iş yeri açılıb. Bu dəyişikliklər təkcə statistikada əks olunmur, Azərbaycanın bütün siması dəyişib. Bakı şəhəri müasir bir şəhərə çevrilib, Azərbaycanın bütün regionları təxminən bu simaya malikdir. Bu reallıq bizi dünyamızı da 12-13 il ərzində köklü dəyişməsinə inandırır".
Baş nazirin müavini qeyd edib ki, dünyada qaçqın və məcburi köçkün problemləri, münaqişələr aradan qalxmalıdır ki, Dayanıqlı İnkişaf Məqsədlərinə nail olmaq mümkün olsun:
"Məcburi köçkün problemini yaşayan ölkələr arasında Azərbaycan zaman baxımından öndə gedən ölkələrdəndir. Azərbaycan hökuməti imkanlarının böyük bir hissəsini bu insanların həyatının yaxşılaşdırmasına sərf etsə də, onların işğal olunmuş torpaqları hazırda istifadəsiz qalıb. Biz əslində 2030-cu ilə qədər dünyanın simasını dəyişmək üçün problemin həllində beynəlxalq əməkdaşlığın əhəmiyyətini vurğulamaq istəyirik. Buna görə bugünkü tədbirin adı da belə qoyulub", deyə Əli Əhmədov qeyd edib.