Gündəlik həyatımızın bir hissəsi olan sosial medianın cəmiyyətlərin rifahına və inkişafına verdiyi müsbət töhfələri yüksək dəyərləndiririk.
Eurasia Diary xəbər verir ki, bu sözləri millət vəkili Qənirə Paşayeva “Sosial media: sosial tellər və ya insan haqlarına hədələr” mövzusunda müzakirələrdə çıxışı zamanı deyib. Deputat Ermənistanı, erməni diasporu və bəzi siyasi gücləri sosial media vasitəsilə Azərbaycan əleyhinə yalanlar yaymaqda ittiham edib:
“Sosial medianın fərdlər və cəmiyyətimiz üçün faydalı potensialına baxmayaraq, onlardan sui-istifadə fərdi hüquqlarımıza və rifahımıza, demokratik institutların fəaliyyətinə və cəmiyyətlərin inkişafına mane olur, kiber-təqib, zorakılıq və diskriminasiyaya təhrikə, dezinformasiya, ictimai rəyin manipulyasiyasına və siyasi proseslərə təsir etmə kimi ziyanlı fəsadlara yol açır. Müasir dünyada sosial media vasitəsilə yayılan və getdikcə artan yanlış məlumatların dövlətlər və cəmiyyətlər üçün ciddi təhlükəyə çevrilməsi hamımızı ciddi narahat etməlidir. Təhlükəli dezinformasiya meyillərindən yaxa qurtarmaq üçün dəqiq siyasət hazırlanıb həyata keçirilməlidir. Qətnamə layihəsində vurğulandığı kimi dövlət orqanları və internet şirkətləri ifadə və informasiya azadlığını müdafiə etmək səyləri ilə qanunsuz məzmunlu məlumatların yayılmasının dayandırılması və keyfiyyətli məlumatın təmin edilməsi səylərini əlaqələndirməlidirlər. Bu gün söz azadlığı adı altında saxta informasiyalar yayanların sayı artır. Bu, çox təhlükəlidir və bu cür halları cəmiyyətə qarşı terror da adlandırmaq olar”.
Deputat bildirib ki, Azərbaycan da dezinformasiyalara qarşı mübarizə aparır və bununla bağlı beynəlxalq təşəbbüsləri daim dəstəkləyir:
“Çünki da dezinformasiyalardan ən çox əziyyət çəkən ölkələrdən biriyik. Bu dezinformasiyaların əksəriyyəti məqsədli olaraq yayılır. Başda Ermənistan olmaqla bəzi ölkələrin, bir sıra siyasi güclərin, erməni diaspor və lobbisinin və bəzi şirkətlərin maraqları çərçivəsində həyata keçirilən bu dezinformasiyaların məqsədi Azərbaycanın dünyadakı imicinə zərbə vurmaq, təzyiq göstərməkdir. Bu, bizi ciddi narahat edir. Azərbaycanda “Yanlış məlumatlandırma siyasəti - müasir dünyada sabitliyə təhdid” mövzusunda önəmli tədbir keçirildi. Bütün üzv ölkələrdə jurnalistlər, siyasətçilər və özəlliklə gənc nəsillərin iştirakı ilə bu mövzuda tədbirlərin keçirilməsinə ciddi ehtiyac var”.