Dini Qurumlarla İş üzrə Dövlət Komitəsinin sədr müavini Gündüz İsmayılov 5-ci Ümümdünya Mədəniyyətlərarası Dialoq Forumu çərçivəsində keçirilən "Gənclər sülh naminə: şiddətli ekstrimizmə qarşı əks qüvvənin formalaşdırılması –BMT-nin Sivilizasiyalar Alyansı üzrə Ali nümayəndəsi ilə müzakirə" adlı plenar sessiyada çıxış edib. Eurasia Diary çıxışın mətnini təqdim edir:
Özümün də şahidi olduğum iki hadisəni paylaşmaq istəyirəm. 10-15 il öncə Azərbaycana səfər edən ingilis jurnalist Ceyms Smit neft və xalça haqqında yazı hazırlamaq istəyirdi. Lakin Azərbaycanla tanış olduqdan sonra fikrini dəyişir. Belə ki, mənlə görüşəndə Azərbaycanda 2600 il öncə yəhudilərin, sonra xristianların və 7-ci əsrdən etibarən müsəlmanların yaşadığını, lakin bu ərazidə bir dəfə də olsun etnik və ya dini münaqişənin baş vermədiyini dedi. Bunun səbəbi nədir? "Avropada, Qərbdə nə müsəlman, yəhudi, nə xristian, nə də başqa dinin nümayəndəsi təzyiqə məruz qala bilməz. Hər bir vətəndaşın hüququ qorunur. Azərbaycanda da yəhudilərin, xristianların və müsəlmanların hüququ qorunur. Lakin fərq burasındadır ki, Azərbaycan üçün tolerantlıq təkcə hüquqi deyil, həm də mənəviyyat və mədəniyyət məsələsidir", o dedi. Mən bununla bir daha əmin oldum ki, biz bu sahədə təkcə hüququ dəyişməli deyil, həm də mənəviyyat sahəsində çalışmalıyıq.
Bir dəfə isə institutda qızğın müzakirələr zamanı tələbələrdən biri professora sual verdi. Necə edək ki, daha yaxşı müsəlman olaq? Professor "Daha yaxşı müsəlman olmaq istəyirsinizsə, öncə İNSAN olacaqsınız", dedi.
2017-ci ildə İlham Əliyevin sərəncamı ilə yaradılan Mənəvi Dəyərlərin Təbliği Fondunun məqsədi məhz bu mənəvi dəyərləri təbliğ etməkdir. Burada yalnız İslam deyil, bütün bəşəri dəyərlərin təbliği nəzərdə tutulur. Bura din xadimlərinə maddi dəstək, Dini icmalara mənəvi dəyərlərin təbliği ilə bağlı layihələrdə həm maddi, həm də təşkilati dəstəyin göstərilməsi, təhsil müəssisələri, KİV daxil olmaqla müxtəlif sənədli filmlərdən tutmuş kiçik sosial çarxların çəkilməsinə kimi fəaliyyətləri ehtiva edir.
Biz hamımız bir planetdə yaşayırıq və dialoqdan başqa qaynağımız yoxdur. İslam peyğəmbəri "Cənnətə getmək istəyirsizsə iman gətirməlisiniz, amma bir-birinizi sevmirsinizsə iman gətirmiş olmazsınız" deyir. Bütün dinlərin məqsədi sevgidən, mərhəmətdən keçir. Mədəniyyətlərarası dialoqun baş tutması üçün əlverişli ədalətli mühit lazımdır. Bu baxımdan təkcə din xadimlərinin deyil, siyasətçilərin də üzərinə məsuliyyət düşür. Azərbaycan ərazisinin 20%i işğal olunub. Laçın rayonu işğal olunanda mənim 10 yaşım vardı. Bu 27 il ərzində doğma torpaqlarıma qayıda bilməmişəm və övladlarım da bu problemlə qarşılaşır. Beləliklə ədalətsizlik davam edir. Dünya ölkələri Azərbaycan kimi ədalətli, qəti mövqe nümayiş etdirməlidir. Fikir verirsinizsə, işğala məruz qalmış bir ölkədə işğala məruz qalmış şəxs dialoqdan danışır. Bu özü Azərbaycan dövlətinin nə qədər uğurlu siyasət yürütdüyünü və güclü dövlət olduğunu göstərir.
Gülnar Səlimova