Rusiya Xarici İşlər Nazirliyi may ayının 6-sında neofaşizm, neonasizim, ksenefobiya və irqçiliklə bağlı yeni raport hazırlayıb. Hazırlanan raportda yuxarda adları çəkilən “zəhərli ideologiyalar”ın hazırda regionda və dünyada daha çox hansı ərazilərdə yayıldığı barədə məlumatlar və siyahı qeyd edilib. Bu raportda bizi maraqlandıran əsas cəhət Azərbaycan və Ermənistanın da adlarının bu siyahıda olmasıdır.
Raportda Azərbaycanda neofaşizm cərəyanının yayılma tempiylə bağlı qeyd edilir ki, “Azərbaycanda praktiki olaraq neofaşizm, irqçilik və ksenefobiya mövcud deyil. Həmçinin bu zərərli ideologiyaların təbliğatına görə Azərbaycan qanunvericiliyində ciddi cəzalar öz əksini tapır. Azərbaycanda heç bir siyasi partiya, qurum və ya təşkilat öz platformalarına radikal prinsip və ideyaları daxil etməyib”.
Eyni raportda Ermənistan barədə maraqlı faktlardan söhbət açılır. Qeyd edilir ki, faktiki olaraq Ermənistan neofaşizmin yayılması və təbliğatına yanaşması nöqteyi-nəzərdən Rusiya ilə eyni mövqeyi bölüşür. Həmçinin Ermənistanda hər il 9 may qələbə bayramı təntənə ilə qeyd edilir. Ermənistanda dövlət tərəfindən mühafizə edilən 500-yə yaxın abidə var, hansı ki, onlar ikinci dünya müharibəsi qəhərəmanları şərəfinə ucaldılıb. Lakin bununla belə Ermənistanda Respublikaçıların (Sarkisyan) iqtidarı zamanı faşist siyasi xadimlərinin adlarının ucaldılmasıyla bağlı addımlar atıb. Məsələn, onların hakimiyyəti dövründə Ermənistanda faşistlərlə sıx əlaqəsi olan Qaregin Njdenin abidəsi ucaldılıb.
Bundan savayı Ermənistanda fəaliyyət göstərən bəzi siyasi qruplar radikal, neofaşist mövqeyi ilə seçilir. Bu qruplardan biri də 2018-ci ildə siyasi partiya olaraq qeydiyyatdan keçən "Sosna-Trer" partiyasıdır. Bu partiyanın ideologiyası və siyasi platformasında siyasi radilakizm əyani şəkildə hiss olunur. Sosna-Trer partiyası Ermənistanın hazırki sərhədlərini tanımır, Qarabağı Ermənistana birləşdirməyi tələb edir, dünya ermənilərini birləşdirib böyük Ermənistan uğrunda çalışmağı təbliğ edir, Naxçıvanı ələ keçirmək kimi radikal və faşist tələblər irəli sürür. Bu və digər təşkilatların hələ də fəaliyyətlərini davam etdirməsi Ermənistanda neofaşist ünsürlərin hələ də mövcud olduğundan xəbər verir.
Qeyd edək ki, bu partiyanın üzvləri ötən il həyata keçirilən məxməri inqilabda fəal iştirak etmiş və bir hərbi bazanı ələ keçirmişdi. Partiyanın qurucuları və əksər üzvləri keçmiş döyüşçülərdir.
Nicat İsmayılov
