Bü gün Beynəlxalq Muğam Mərkəzində Ümumdünya Qaçqınlar Günü ilə əlaqədar beynəlxalq tədbir keçirilib.
Tədbirdə çıxış edən Azərbaycan Respublikası Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Azərbaycanda yaşayan qaçqınlarla bağlı mühüm tədbirlər keçirildiyini qeyd edib. O, buna görə BMT-nin Azərbaycandakı qurumlarına təşəkkür edib.
"İnanıram ki, gələcəkdə də bu istiqamətdə inamlı addımlar atılacaq. Qaçqınlarla bağlı yaranan problemi kökündən həll etmək lazımdır. Bunun üçün, beynəlxalq hüquq, BMT kimi təşkilat və onun qətnamələri mövcuddur. Qaçqınlara ən düzgün yanaşma və ən yaxşı dəstək onları öz torpaqlarına qaytarmaqdır. Onlara Azərbaycanda və yaxud dünyada dəstək var. Amma bu kifayət etmir. Çünki, bu insanlar keçmişlərini itiriblər, gələcəkləri isə şübhə altındadır".
Komitə sədri Azərbaycanda qaçqın və məcburi köçkünlərlə bağlı atılan addımların nümunəvi olduğunu, ölkənin öz imkanlarını vətəndaşına yönəldə bildiyini vurğulayaraq qeyd edib.
"Məsələ siyasi həllini tapmamış ölkə prezidenti köçkünlərin yaşayış şəraitini yaxşılaşdırmaq üçün mühüm addımlar atdı. Bu günə qədər Azərbaycanda 300 mindən çox məcburi köçkün evlə təmin edilib. Biz gündəlik fəaliyyətimizdə qaçqınlarla görüş zamanı onların keçirdikləri ağır hisslərin şahidi oluruq.
Rövşən Rzayev BMT-nin Azərbaycandakı qurumlarına müraciət edərək, BMT-nin qəbul etdiyi 4 qətnamənin icra edilmə mexanizminin araşdırılması ilə bağlı bəyanat verməyə çağırıb.
"Ermənistan öz işğalçı siyasətindən əl çəkməli, Azərbaycan əhalisi öz doğma torpaqlarına qayıtmalıdır. Hər bir insanın layiqli həyat səviyyəsində yaşamaq hüququ təmin olunmalıdır. Ancaq dünyada yaşayan qaçqınların heç də hamısı bu imkandan yararlana bilmir. Biz hər birimiz, birinci növbədə Azərbaycan vətəndaşları, dünyadakı aparıcı dövlətlər və beynəlxalq qurumlar daha ciddi və daha uğurlu addımlar atmalıdır", deyə Rövşən Rzayev bildirib.