Liviya Milli Ordusu Türkiyə hədəflərini düşmən hədəf elan etdi və Liviya hava məkanını Türkiyə üçün bağlı elan etdi.
Eurasia Diary xəbər verir ki, Liviya Milli Ordusunun (Həftərin ordusunun) mətbuat katibi Əhməd Əl-Mismari mətbuata verdiyi açıqlamada Türkiyəni təhdid edib.
Mismari iddia edib ki, son həftələrdə Liviyanın paytaxtı Tripoli şəhəri ətrafında baş verən toqquşmalarda Türkiyə qeyri-qanuni şəkildə Liviya torpaqlarına hücumlar təşkil edib.
Mismari buna görə də Türkiyədən Liviyaya uçan hər təyyarənin düşmən hədəf elan edildiyini, iqtisadi məqsədlərlə uçan təyyarələrin əngəllənəcəyini və bütün bunların Liviya limanlarına yanaşan türk gəmilərinə də şamil edilcəyini bildirib.
Mismari həmçinin qeyd edib ki, Liviya Milli Ordusuna ölkədəki türk şirkətləri və gəmilərinə atəş açılacağı əmri verilib. O, eyni zamanda Liviyada yaşayan türk vətəndaşlarının həbs edilcəyini söyləyib.
Türkiyə prezidenti Rəcəb Tayyip Ərdoğan G-20 sammitində jurnalistlərin bu problemə dair verdiyi sualları cavablandırarkən qeyd edib ki, "Məsələ haqqında konkret məlumatım yoxdur, lakin gərəkli tədbirlər əvvəlcədən görülüb".
Qeyd edək ki, Liviyanın keçmiş lideri Müəmmər Qəddafi devrildikdən sonra ölkədə sabitlik təmin edilə bilməmiş və vətəndaş müharibəsi başlamışdı. 2014-cü ildə keçirilən seçkilərdən sonra ölkədə iki hakimiyyət formalaşdı: Misir sərhəddinə yaxın Tobrus mərkəzli Nümayəndələr Məclisi və Tripoli mərkəzli Milli konvensiya Höküməti. Yeri gəlmişkən Türkiyə Milli Konvensiya Hökümətini dəstəkləyir.
Həmçinin qeyd etmək lazımdır ki, son 3 gün ərzində bu Türkiyəyə vurulmuş ikinci zərbədir. Belə ki, iki gün öncə İdlibdə Suriya ordusu (Əsəd qüvvələri) türk mövqelərini atəşə tutmuş, nəticədə bir türk əsgəri şəhid olmuş, 5-i isə yaralanmışdı.