Millət vəkilindən Avropa İttifaqı rəhbərinə sərt reaksiya - “Tuskdan soruşmaq lazımdır ki...” | Eurasia Diary - ednews.net

21 İyul,


Millət vəkilindən Avropa İttifaqı rəhbərinə sərt reaksiya - “Tuskdan soruşmaq lazımdır ki...”

Siyasət A- A A+

 

Xəbər verdiyimiz kimi bu gün Azərbaycanda rəsmi səfərdə olan Avropa İttifaqı Şurasının rəhbəri Donald Tusk Prezident İlham Əliyevlə Bakıda keçirilən görüşün yekununda Qarabağ konflikti ilə bağlı maraqlı açıqlamalar verib. 

“Dağlıq Qarabağ münaqişəsinin hərbi yolla həlli yoxdur, yalnız beynəlxalq hüququn prinsiplərinə uyğun siyasi yolla həll oluna bilər.

Avropa İttifaqı Minsk qrupu həmsədrlərinin Helsinki Yekun Aktının başlıca prinsiplərinə əsaslanan ədalətli və dayanıqlı çözümə yönələn səylərini hərtərəfli dəstəkləməyə davam edir”, - deyə Donald Tusk bildirib.

“Bütövlüklə gərginliyin səngiməsindən razıyıq, amma təmas xəttindəki son ölümlərdən həmsədrlər kimi biz də narahatlıq keçiririk. Sülhə yol açan, səmərəli danışıqlar üçün zəmin yaradan ab-havanın bərpası ilə yanaşı, təmkinli olmaq da mühümdür. Aİ də sülhün bərqərar olunmasına dair addımları dəstəkləyərək əhalini barışığa hazırlamaqla bağlı konkret tədbirlərə dəstək verməyə hazırdır”, - Aİ rəhbəri vurğulayıb.

Qeyd edək ki, Tuskun açıqlamaları, xüsusən də Qarabağ konfliktinin müharibə yoluyla həllinin mümkün olmaması barədə fikirləri ölkə ictimaiyyətində geniş müzakirələrə səbəb olub.

Avropa İttifaqı Şurası prezidentinin açıqlamaları ilə bağlı Milli Məclisin deputatı Elman Məmmədov öz fikirlərini Eurasia Diary ilə bölüşüb.

Elman Məmmədov qeyd edib ki, Tusk mahiyyət üzrə xristian dünyasının mövqeyini ortaya qoyub. “Hansı ki, bu mövqe Azərbaycanın deyil, Ermənistanın daha çox xeyrinədir. Artıq 30 ildir Azərbaycan torpaqları işğal altındadır və bu işğal haqqında həm cənab Tuskun rəhbərlik etdiyi Avropa İttifaqı Şurasının, həm BMT-nin həm də bir çox beynəlxalq təşkilatların qətnamələri qəbul edilib. Lakin 30 ildir Ermənistan bu qətnamələrə əməl etmir və əksinə işğalı daha da genişləndirmək niyyətindədir. Bütün bunlar onu göstərir ki, problemin yeganə həll yolu var, o da hərbi yoldur.

Bu gün Tuskun deyil, biz azərbaycanlıların torpaqları işğal altındadır. Cənab Tuskdan soruşmaq lazımdır ki, qan tökülərək işğal edilən torpaq bir neçə qətnamə, qərar və ya diplomatik görüşlər yoluyla necə işğaldan azad edilə bilər? – deyə millət vəkili qeyd edib.

E.Məmmədov həmçinin bildirib ki, Tuskun, o cümlədən, sülh çağırışları edən müxtəlif beynəlxalq təşkilat rəhbərlərinin bu tipli açıqlamaları Azərbaycanın əl-qolunu bağlamaq, Azərbaycanı haqlı müharibəyə başlamaq fikrindən daşındırmaq üçün istifadə edilir: "Bu mövqe Ermənistanın mövqeyidir. İllərdir sözügedən danışıqlar heç bir fayda verməyib. Yenə də verməyəcək, çünki qarşı tərəfin məqsədi problemi həll etmək deyil, problemin həllini yubatmaq və işğalı dünyaya tanıtmaqdır. Buna yol vermək olmaz və yenə də bildirmək istəyirəm ki, kimin nə deməsindən asılı olmayaraq Qarabağ konflikti yalnız müharibə yoluyla öz həllini tapa bilər”.

 

Nicat İsmayılov

 

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...