“Keşikçidağda baş verən hadisə dövlətimiz üçün yaxşı hal deyil”
Bunu Eurasia Diary-ə verdiyi açıqlamada keçmiş deputat, Ümid Partiyasının sədri İqbal Ağazadə bildirib.
Onun sözlərinə görə, sərhəd qoruyan bir əsgərimizə hücum edib silahının əlindən alınaraq, videoçəkiliş edilib paylaşılması gizli mətləblərdən xəbər verir:
“Dövlət Sərhəd Xidmətinin rəhbər strukturlarının təbii ki, bu məsələlərdə böyük suçu var. Zamanında əsgər və zabitlər təlimatlandırılmalı, ekstremal vəziyyətdə mülki şəxslərlə sərhəd zolağında davranış qaydaları və provokasiyalara yanaşma tərzləri onlara izah edilməli idi. Hər bir halda bu məsələdə DSX məsuliyyət daşıyır”- deyə partiya lideri qeyd edib.
İ. Ağazdə Gürcüstan tərəfinin rəsmi şəkildə üzr istəməsi gərəkdiyini vurğulayıb:
“Xarici İşlər Nazirliyi tərəfindən baş verən hadisə əsasında xüsusi nümayəndə heyəti Gürcüstana ezam olunmalı və Gürcüstan tərəfini üzr istəməyə qədər addım atmağa məcbur etməlidir”
Partiya lideri belə hesab edir ki, Respublika Prokurorlugu cinayət işi qaldıraraq, əsgərimizin silahını əlindən alan şəxsin məsuliyyətə cəlb olunmasını təmin etməli, cinayət işini təqib edərək, cinayətkarların layiqli cəza almasına çalışmalıdır. İctimaiyyət nümayəndələri, siyasi partiyalar və təşkilatlar xalqı sakitliyə çağırmalı, Gürcüstanın siyasi institutlarına müraciət olunmalı və provokasiyaları dayandırmaq istiqamətində addımlar atmalarını tələb etməlidirlər.
Sabiq millət vəkili verdiyi açıqlamada vətəndaşları soyuqqanlı olmağa və provakasiyalara getməməyə çağırıb.
“Xalqımız bu hadisənin gerçək mahiyyətinin bəzi dövlətlərin xüsusi xidmət orqanlarının provokasiyası olduğunu qəbul edərək emosional davranmamalı, çağırış və bəyanatlarında təmkinli olmalıdırlar. Bu ilk hadisə deyil. Neft Akademiyasındakı terror, Gəncə hadisələri, yanğın hadisələri və s. tipli hadisələr də məlum dövlətlərin provokasiyası idi. Hələlik, bunların durdurulmasına gücümüz çatmır. Lakin bizə qarşı düzənlənən hadisə və provokasiyaların mahiyyətini bilməklə birlik və bərabərliyimizi nümayiş etdirib Azərbaycanımızı qorumalıyıq”, - deyə “Ümid” sədri bildirib.
Nicat İSMAYILOV