“Azərbaycanın bir problemi var, bu da Qarabağ problemidir. Azərbaycan müəyyən beynəlxalq normalara uyğun olaraq atəşkəs rejiminə riayət edib, bu məsələni sülh yolu ilə həll etməyə çalışır. Lakin sülh yolu ilə həll olunmasa, Azərbaycannın məsələni hərbi yolla həll etməyə, öz torpaqlarını işğalçılardan azad etməyə gücü, qüdrəti, iradəsi, beynəlxalq normalar çərçivəsində hüququ da var. Ona görə də düşünmürəm ki, hansısa bir ölkənin, lap elə qardaş Türkiyənin bizdə bazası yerləşsin”.
Bu sözləri Eurasia Diary-ə açıqlamasında hərbi ekspert, polkovnik Şair Ramaldanov Azərbaycanda Türkiyə Silahlı Qüvvələrinə məxsus hərbi bazanın yerləşdirilməsi ilə bağlı səslənən təkliflərə münasibət bildirərkən deyib.
Həmsöhbətimiz qeyd edib ki, hərbi bazanı müəyyən məqsədlər üçün yerləşdirirlər:
“Azərbaycanın qarşısında elə bir məqsədlər yoxdur. Və Azərbaycana olan təhlükələr də, elə bir formada cərəyan etmir. Azərbaycanın elə bir problemi yoxdur ki, hansısa ola biləcək təhlükəyə cavab verə bilməsin. Birincisi, Azərbaycan bu gün geosiyası arenada balanlaşdırılmış, müstəqil siyasət aparır. Ermənistan xaric, bütün qonşu dövlətlərlə dostluq münasibətləri var. Bütün həmsərhəd dövlətlərlə çox sıx əlaqələri var, hərbi əməkdaşlığı var. Yəni, ona görə də, düşünmürəm ki, bu gün Azərbaycanın hansısa bazaya ehtiyacı olsun. Azərbaycan bu gün həm siyasətinə görə, yerinə görə, imkanlarına görə öz Silahlı Qüvvələrini bundan sonra da inkişaf etdirməyə malik olan bir dövlətdir. Azərbaycan öz təhklükəsizliyini heç bir dövlət kömək etmədən təmin edən bir ölkədir. Ona görə də, bu gün o məsələni qoymağa ehdiyac yoxdur”.
Ş.Ramaldanov Azərbaycana düşmən olan Ermənistanda Rusiya hərbi bazasının olması məsələsinə də toxunub.
“Rusiya hərbi bazası Ermənistanın təhlükəsizliyini təmin etmək məqsədi ilə orada yerləşir. Bizim isə təhlükəsizlik təminatına ehdiyacımız yoxdur. Çünki Azərbaycan bu gün hər hansı bir təhlükəni qarşısına ala biləcək bir dövlətdir. Təhükəsizlik birinci növbədə düzgün qurulmuş geosiyasi arenada aparılan siyasətdir, qonşu ölkələrlə olan münasibətlərdir və bu münasibətlər də yüksək səviyyədədir. Dövlətimiz də geosiyasi arenada seçilmiş, hörmətli bir dövlət kimi tanınır. O ki qaldı Dağlıq Qarabağ məsələsinə, Azərbaycan Respublikasının Prezidenti bir stat gətirib ki, əgər Azərbaycanla ermənini təkbətək qoysalar, Azərbaycan Silahlı Qüvvələri qısa zamanda işğalçı qüvvələri darmadağın edib öz ərazi bütövlüyünü bərpa etməyə malikdir və edəcək də. Ona görə də düşünürəm ki, Türkiyənin bazasını Azərbaycanda yerləşdirmənin varxtı çatmayıb”, -deyə polkovnik bildirib.
Vəfa VƏLİYEVA