Xəbər verdiyimiz kimi, rəsmi İrəvan Gümrüdə azad iqtisadi zona yaratmaq qərarına gəlib. Xatırladaq ki, xeyli müddətdir ki, Azərbaycan da Ələtdə azad iqtisadi zonanın yaradılması istiqamətində ciddi iş aparır.
Maraqlıdır, bu məsələdə kimin önə düşməsi, hansı dövlətin azad iqtsiadi zonanın fəaliyyətinə daha tez nail olmasının iqtisadi divident baxımından bir önəmi varmı? Cənubi Qafqazda ticari təşəbbüsü ələ almaq, regionun əsas iqtisadi güc mərkəzinə çevrilmək baxımından bu müstəvidə öncüllük nə dərəcədə zəruridir?
Moderator.az-a açıqlama verən millət vəkili Vahid Əhmədov hesab edir ki, hansı dövlətin azad iqtisadi zonanın fəaliyyətinə daha tez nail olmasının elə bir əhəmiyyəti yoxdur. Bununla yanaşı millət vəkili azad iqtisadi zonaların yaradılması prosesini sürətləndirməyin də zəruri olduğuna diqqət çəkdi:
“Hər dövlətin özünün iqtisadi siyasəti var. Hər dövlət öz iqtisadi siyasətinə uyğun da addımlar atır. Azərbaycanda azad iqtsiadi zonanın yaradılması ilə bağlı çoxdan müəyyən söhbətlər gedirdi. Hətta rəhmətlik Heydər Əliyevin vaxtında Sumqayıtda azad iqtsiadi zona yaratmaq istəyirdilər. Sonra nədənsə bu istək gerçəkləşdirilmədi.
Azərbaycan azad iqtsiadi zonanın yaradılması üçün çox əlverişli imkanı var. Azərbaycanda dəniz də, dəmir yolu da var. Avtomobil yolları da mövcuddur. Bu səbəbdən də ölkəmizdə azad iqtisadi zonanın yaradılması imkanları yüksəkdir.
Biz Ələtdə azad iqtsiadi zonanın yaradılması ilə bağlı qanun layihəsi qəbul elədik. Burada azad iqtisadi zonanın yardılması başa çatandan sonra bunun ölkə iqtisadiyyatına müsbət təsirinə şahid olacayıq.
Bu baxımdan azad iqtisadi zonanın ilk olaraq hansı ölkədə yaradılması o qədər də əhəmiyyət kəsb etmir. Bu, hər bir dövlətin daxili işidir və onun iqtisadi siyasətindən qaynaqlanır. Qonşu İranda azad iqtisadi zonaların yaradılması geniş vüsət alıb və çox ciddi inkişaf var. Ümumdaxili mnəhsul təxminən 35-37% artıb. Azərbaycanda da azad iqtisadi zonaların yaradılmasına çox ciddi ehtiyac var. Quba-Xaçmaz tərəfdə, Rusiya ilə sərhəddə həm dəniz, həm də dəmir yolu mövcuddur. Orada azad iqtisadi zona yaratmaq olar. Lənkəran tərəfdə də azad iqtsiadi zona yaratmaq mümkündür. Bu məsələləri diqqətdə saxlamaq lazımdır. Çünki bz bu məsələlərdə gecikirik”.