Xəbər verdiyimiz kimi, rəsmi İrəvan İraq və Suriyadakı ermənilərin Ermənistana axını üçün yeni layihəyə start verib. Hansı ki, Ermənistana gətiriləcək həmin ermənilərin Qarabağda – Azərbaycanın işğal edilmiş torpaqlarında yerləşdirilməsi ehtimalı olduqca böyükdür.
Rəsmi Bakı İraq, Suriya və eləcə də dünyanın digər bölgələrində məskunlaşan ermənilərin işğal edilmiş Azərbaycan torpaqlarında məskunlaşmasını əngəlləmək üçün hansısa addımlar atmalıdırmı? Ən azından XİN tərəfindən bu ölkələrdə maarifləndirici xarakterli iş aparılması faydalı olarmı?
Eurasia Diary "moderator.az"a istinadən xəbər verir ki, açıqlama verən sabiq XİN rəhbəri Tofiq Zülfüqarov bu məsələdə Milli Məclisin üzərinə daha böyük məsuliyyətin düşdüyünü qeyd etdi:
“Hesab edirəm ki, bu məsələ ilə bağlı Milli Məclisin qərarına daha çox ehtiyac var. Milli Məclis ali qanunverici orqan olaraq xüsusi bir qərar çıxarmalıdır ki, işğal edilmiş ərazilərdə iqtisadi, demoqrafik və siyasi baxımdan Azərbaycan qanunlarını pozan hansısa addım atılarsa, bunun hüquqi əsası olmayacaq. Yəni bu torpaqlarda qanunsuz olaraq məskunlaşan şəxslərin bu torpaqlar azad ediləndən sonra heç bir hüququ olmayacaq. Onlara bu torpaqlarda yaşamağa imkan və icazə verilməyəcək.
Sizi inandırıram ki, belə bir qərar olsa, bu, öz müsbət təsirini göstərər. Suriya, İraq və s. kimi ölkələrdən ermənilər müharibəyə, problemlərə görə qaçırlar. Yeni müharibə və problemlər təbii ki, onlara sərf etmir. Bu ermənilərin bir çoxu Ermənistana gələndən sonra oradan Rusiyaya, Avropaya axın edirlər. Əslində Qarabağda məskunlaşmaq bu ermənilərin öz maraqları baxımından da arzuedilməzdir. Çünki müharibə təhlükəsi hər zaman onların başlarının üstündə olacaq. Bu baxımdan hesab edirəm ki, Milli Məclisin belə bir qərar verməsi ermənilərin işğal edilmiş torpaqlarda məskunlaşma prosesinin qarşısısnı əhəmiyyətli dərəcədə ala bilər”.