İndiki Ermənistan ərazisindəki 1989-cu ilədək Azərbaycan türklərinin və müsəlman kürdlərin yaşadığı Vedi şəhərinin yaxınlığındakı Orçadzor adlı yerdə dağıdılmış müsəlman qəbiristanlığının görüntüləri yayılıb.
Eurasia Diary-nin verdiyi xəbərə görə, həmin görüntülərdə Narine Kirokosyan adlı erməni politoloq və ictimai fəal digər ictimai fəallarla birlikdə, Ararat bölgəsinə qədim abidələri çəkmək üçün İrəvandan gəliblər. Burada onlar müsəlman qəbiristanlığının barbarcasına dağıdılmasının şahidi olublar.
Özünü Mədəni İrsin Qorunması Fondunun (FPWC) əməkdaşı kimi təqdim edən qəbiristanlıq keşikçisi, buranın özəl ərazi olduğunu və kənar adamların girişinin tövsiyə olunmadığını deyib. İctimai fəallardan ibarət qrup dağıdılmış abidəni çəkməyə başlayanda, onları qəbiristanlığın ərazisindən qovmağa başlayıblar.
Erməni politoloq təəccüb ifadə edib və mədəni irsi qorumalı olan bir fondun əslində bu qəbiristanlığın timsalında mədəni irsin özünü məhv etdiyini deyib.
"Əgər bu tarixi-mədəni irsin qorunması fondudursa, o zaman hətta bu kürdlər və ya türklər burada yaşamırlarsa belə, hansı haqla qəbiristanlıq məhv edilir?
Bu qəbiristanlıq tamamilə məhv edilməmiş onun qorunmasına kömək etmələri üçün beynəlxalq ictimaiyyətə müraciət edirik. Yeri gəlmişkən, bu Fondun rəhbəri Ermənistanda tanınmış şəxs olan Ruben Xaçaturyandır. Yerevan zooparkı da ona məxsusdur. Dağın arxasında isə Xosrov Təbiət Qoruğu yerləşir", -deyə o bildirib.
.png)
.png)
.png)
