Türkiyə prezidenti Rəcəb Tayyib Ərdoğan Ankarada 29 böyük şəhərin bələdiyyə başçıları ilə görüşüb.

Eurasia Diary xəbər verir ki, "Milliyet"in yazdığına görə, tədbirdə diqqət çəkən məqamlardan biri dövlət başçısının İstanbul Böyükşəhər Bələdiyyəsinin başqanı (İBB) Əkrəm İmamoğlunun adını çəkmədən onun ünvanına səsləndirdiyi tənqidlər olub.

Bildirilir ki, Ərdoğan özünün vaxtilə İstanbula bələdiyyə başqanı seçiləndən sonra orada öncədən çalışan, öz zəhməti hesabına maaş alan heç kimə toxunmadığını bildirib:

“Heç kimi vəzifəsindən, çörəyindən məhrum etmədim. Vəzifəyə gələndə şəhərin üzərinə çökmüş nəhəng problemlərlə və ən az onlar qədər böyük bir borc yükü ilə rastlaşdım. Problemlərimizi bir-bir həll edib borclarımızı səbrlə ödədim. Nə işçilər, nə avtomobillər, nə də başqa bir şeyə qarşı mübarizə apardım. Bütün vaxtımı şəhərin problemlərinin, xalqın sıxıntılarının həllinə sərf etdim. Bütün bələdiyyə başqanlarından da eyni həssaslığı nümayiş etdirməyi gözləyirəm”.

Görüşdən sonra jurnalistlərə açıqlama verən Ə.İmamoğlu prezidentin “Biz nə işçilərlə, nə də avtomobillərlə mübarizə apardıq. Eyni həssaslığı gözləyirəm" ifadəsinə “Biz həssasıq. Açığı kimi nəzərdə tutdu, bilmirəm" şəklində cavab verib.

Qeyd edək ki, Ə.İmamoğlu bir neçə gün öncə ödənişi İBB tərəfindən edilən yüzlərlə məmur avtomobilini "Yeni qapı" meydanına gətizdirməyə başlayıb. Bu isə AKP-li məmurları narahat etməyə başlayıb.