Bakıda Ümumdünya Mətbuat Şuraları Assosiasiyasının illik toplantısı davam edir.
Eurasia Diary-nin verdiyi xəbərə görə, yığıncaqda 100-dək media nümayəndəsi, o cümlədən Azərbaycandan 60 nümayəndə iştirak edir.
Toplantıda çıxış edən Azərbaycan Mətbuat Şurasının sədri Əflatun Amaşov bildirib ki, Ümumdünya Mətbuat Şuraları Assosiasiyası 1992-ci ildə yaradılıb: "ABŞ-ın müəyyən ştatları, Türkiyə, Hindistan, Pakistan, Banqladeş, Nepal, Zimbabve, Kenya, Makedoniya və digər ölkələrin jurnalistləri belə bir qurum yaradıblar. O vaxtdan indiyə qədər qurum üzv ölkələrdə tədbirlər keçirir və jurnalistlərin qarşılaşdığı problem, informasiya əldə etmələri ilə bağlı yaranmış maneələrin aradan qaldırılması üçün təkliflər səsləndirilir. Yığıncaqlarda ümumilikdə dünyada medianın inkişaf meylləri müzakirə olunur".
Əflatun Amaşov bildirib ki, Azərbaycan Mətbuat Şurası 2005-ci ildən bu qurumun üzvüdür.
MŞ sədri qeyd edib ki, Azərbaycanda son illərdə media sahəsində uğurlar əldə olunub: "1998-ci ildə ölkədə senzura ləğv edilib, qanunvericilik bazası təkmilləşdirilib. Ölkədə artıq heç bir qurum mediaya nəzarət etmir, media tam müstəqildir. Azərbaycanda internet media da fəaliyyətini uğurla davam etdirir. Ölkəmizdə 3 milyona yaxın insan sosial şəbəkədən istifadə edir. Azərbaycanda etnik qruplar sülh və əminamanlıq şəraitində yaşayırlar. Media da bu istiqamətdə dövlət siyasətini dəstəkləyir".
Qeyd edək ki, iştirakçılar tədbirdə öz ölkələrində söz azadlığı və medianın durumu, o cümlədən mövcud problemlərə dair məruzələrlə çıxış edəcəklər.
Ümumdünya Mətbuat Şuraları Assosiasiyasının illik toplantısı sentyabrın 15-dək davam edəcək.