Bu gün BMT Qaçqınlar üzrə Ali Komissarlığının (BMT QAK) Azərbaycandakı nümayəndəsi Guido Ambroso və Almaniyanın Azərbaycandakı səfiri Volfqanq Maniq ali təhsil xərclərinin qarşılanması məqsədi ilə təqaüd almış 9 qaçqın tələbə ilə görüşüblər. Eurasia Diary xəbər verir ki, təqaüdlər Almaniya federal hökumətinin maliyyə dəstəyi ilə BMT QAK-ın DAFI (Qaçqınlar üçün Albert Eynşteyn adına alman akademik təşəbbüsü) proqramı çərçivəsində verilib.
BMT QAK-ın ali təhsil təqaüdü proqramı olan DAFI dünyada qaçqınların ali təhsil almasında mühüm rol oynayır. Təsis edildiyi 1992-ci ildən indiyədək proqram çərçivəsində 15.500-dən çox qaçqın tələbənin sığınacaq tapdıqları 50-dən artıq ölkənin, o cümlədən Azərbaycanın universitet və kolleclərində təhsil almalarına yardım göstərilib. DAFI proqramı Azərbaycanda 2010-cu ildə fəaliyyətə başlayıb, indiyədək 36 gənc qaçqına dəstək göstərilib, o cümlədən bu yaxınlarda 2019-2020-ci tədris ilinin başlanması ərəfəsində 9 yeni tələbə bu məqsəd üçün seçilib.
Görüşdəki nitqində BMT QAK-ın Ölkə üzrə nümayəndəsi Guido Ambroso qaçqınların həyatlarını yenidən qurmalarına imkan yaradılmasında təhsilin vacibliyini və rolunu vurğulayıb: "Keyfiyyətli təhsil və maddi baxımdan təminat imkanlarının artırılması vasitəsi ilə insan potensialının təşviq edilməsi BMT QAK-ın qlobal strateji prioritetlərindən biridir, habelə pulsuz və keyfiyyətli təhsili hədəf kimi qarşıya qoyan 4-cü dayanıqlı inkişaf məqsədinə uyğundur." Nümayəndə, həmçinin beynəlxalq himayəyə ehtiyacı olan şəxslərin ölkədə qalmasına icazə verdiyinə görə Azərbaycan hökumətinə minnətdarlığını ifadə edib. Cənab Ambroso BMT QAK-ın mandatı altında olan qaçqınların tezliklə qanuni işləmək hüququna malik olacaqları ilə bağlı nikbin gözləntisini bölüşüb və ölkənin inkişafına onların töhfə vermələrinə imkan yaradacağını qeyd edib. Guido Ambroso çıxışının sonunda BMT QAK-dan müavinət alan qaçqınları, o cümlədən, DAFİ təqaüd proqramından dəstək alan tələbələri ödənişsiz olaraq bank kartları ilə təmin etdiyinə görə Azərbaycan Beynəlxalq Bankına təşəkkür edib.
Almaniyanın Azərbaycandakı səfiri Volfqanq Maniq tələbələri təbrik edib və ali təhsillərində onlara uğurlar arzulayıb: "Biz gənclərin və istedadlı tələblərin öz potensiallarını tam inkişaf etdirmələrinə dəstək verməkdən və onların həyatı üçün perspektiv yaratmaqdan qürur duyuruq və məmnunuq."
Azərbaycan Respublikası Dövlət Miqrasiya Xidmətinin Qaçqın Statusunun Müəyyənləşdirilməsi İdarəsinin rəisi Aydan Seyidova miqrantların, qaçqınların və sığınacaq axtaranların himayəsinin və onlara təklif olunan xidmətlərin keyfiyyətinin yaxşılaşdırılmasında Azərbaycan hökumətinin gördüyü işləri qeyd edib.
Tədbirdə, həmçinin yeni seçilmiş tələbələrin valideynləri və qaçqın icmasının nümayəndələri iştirak ediblər. Onlar övladlarının ali təhsil alması yolundakı başlıca əngəllərin aradan qaldırılmasına görə Almaniya hökumətinin BMT QAK vasitəsilə göstərdiyi alicənab dəstəyi yüksək qiymətləndiriblər. Valideynlər, həmçinin Azərbaycanda qaçqınlar üçün yaradılan səmimi qonaqpərvərlik mühitini yüksək dəyərləndirib, tolerantlığına və qonaqpərvərliyinə görə yerli sakinlərə minnətdar olduqlarını bildiriblər.
BMT QAK keçmiş Sovet İttifaqında BMT QAK-ın birinci fövqəladə yardım əməliyyatı çərçivəsində Azərbaycanda 1992-ci ilin dekabrında fəaliyyətə başlayıb. Ali Komissarlığa zorakılıq, təqib, müharibə və ya fəlakət səbəbindən yurdunu tərk etmiş hər kəsin sığınacaq axtarmaq və təhlükəsiz sığınacaq tapmaq hüququnu təmin etmək vəzifəsi həvalə olunub. 1950-ci ildən bəri Ali Komissarlıq müxtəlif qitələrdə çoxsaylı böhran halları ilə üzləşib və qaçqınlara, sığınacaq axtaran şəxslərə, məcburi köçkünlərə, eləcə də vətəndaşlığı olmayan şəxslərə həyati əhəmiyyətli yardımlar göstərib.
