Bakının Qafqaz İslam Ordusu tərəfindən işğaldan azad edilməsinin 101-ci il dönümü münasibətlə Bakıda səfərdə olan Türkiyə Silahlı Qüvvələrinin təqaüddə olan general-mayoru, Kipr müharibəsi qazisi Cumhur Evcil maraqlı açıqlamalarla gündəmə gəlib.
Türkiyəli general deyib ki, 101 il öncə Ənvər paşa Türkiyənin ölüm - qalım mücadiləsi verməsinə baxmayaraq qardaş Azərbaycanı erməni işğalından xilas etmək üçün ordu yaradaraq qardaşı Nuru paşanın komandanlığında Azərbaycana göndərsə də 90-cı illərdə Azərbaycanı erməni işğalından xilas etmək üçün Türkiyədə ikinci Ənvər paşa olmadı...
Eurasia Diary xəbər verir ki, moderator.az mövzunu davam etdirərək Türkiyə siyasi həyatını yaxından izləyən ermənişünas alim, professor Qafar Çaxmaqlıdan "Sizcə, Ərdoğanın Türkiyənin ikinci Ənvər Paşası olmaq şansı varmı və sizcə o bu şansdan istifadə edəcəkmi?" sualına aşağıdakı cavabı alıb:
Bakının qurtuluşunun 101-ci ildönümündə Qafqaz İslam Ordusu və onun cəsur komandiri, Bakı fatehi Nuru paşanı hörmətlə anmalıyıq. Bu gün biz Bakıda rahat yaşaya biliriksə, bunu hardasa Nuru paşanın xidməti hesab etməliyik. Mən bir neçə il öncə bir yazı yazmışdım. Adını da "hanı Nuru paşanın heykəli? qoymuşdum. Doğrudan da bizim bu şəxsə bir vəfa borcumuz var. Bakının ən yaxşı yerlərindən birində Nuru paşanın heykəli yoxdursa, demək biz hələ o borcu verməmişik. 1990-cı illərdə Azərbaycan Qarabağda erməni təcavüzünə qarşı müharibədə ikən çox təəssüf ki, yeni "Nuru paşalar" ortaya çıxmadı. Xalq olaraq bütün Anadolu türkləri Azərbaycanın yanında idilər və könüllü olaraq gəlib Qarabağda vuruşan igid insanlar olduğunu bilirik. Amma o zamanın şərtlərində Türkiyənin dövlət olaraq bizə dəstək verməsini mümkün hesab etmədilər. Bunun çoxlu səbəbləri var. Bəlkə də o zaman bir cəsarətli rəhbər olsaydı, bir "dəli addımla" hər şeyi başqa səmtə yönəldə bilərdi. Olmadı. Nəticədə biz ərazimizin bir hissəsini tərk etməyə məcbur olduq. Və dözülməz bir bir sonuclara qatlanmaq zorunda qaldıq. İşğal çox uzun sürdü. Və görünən odur ki, bu məsələni danışıqlar yolu ilə həll etmək mümkün olmayacaq. Mən son illər bu qənaətə gəlmişəm ki, Dağlıq Qarabağ məsələsini öz xeyrimizə həll eləmək üçün Türkiyəni bu işə cəlb etməliyik. Siyasətimizi elə qurmalıyıq ki, Türkiyə bu prosesin içində olsun. Dağlıq Qarabağ Türkiyənin hər hansə vilayəti kimi alqılansın və buranın işğaldan qurtarılmasını öz məsələsi hesab eləsin. Sanki Türkiyənin Ərzurum vilayəti işğal altına düşüb və onu xilas etmək üçün hansı addımları atacaqsa, hansı tədbirlər görəcəksə onu etsin. İndiki Türkiyə lideri Ərdoğanın əslində vizyonu çox genişdir, o, dövlətinin təhlükəsizliyini təmin etmək üçün sərhəd ötəsi əməliyyatları cəsarətlə davam etdirir. Bəs Qarabağ? Məgər Qarabağın işğal altında bunca illər qalması Türkiyənin təhlükəsizliyinə təhdid deyil? Bu gün Türkiyədə Ənvər paşalar, Nuru paşalar yüzlərcədir və inanıram ki, siyasi iradənin gətirdiyi gələcək imkanlar Qarabağın xilasını da bizə göstərəcək. Türkiyədə bu şüarı hər yerdə səsləndirirlər və hər dəfə bunu dinləyəndə insanın köksü qabarır "Qarabağ bizimdir, bizim olacaq".