Azərbaycanın bu görüşə qatılması səhv addımdır.

Eurasia Diary xəbər verir ki, sabiq xarici işlər naziri Tofiq Zülfüqarov Redaktor.az-a açıqlamasında 23 sentyabrda Azərbaycan və Ermənistan Xarici İşlər nazirləri arasında ATƏT-in Minsk Qrupunun həmsədrlərinin vasitəçiliyi ilə görüşün keçirilməsinə münasibət bildirib.

Sabiq nazir hesab edir ki, Paşinyan radikal bəyanatlarını təkzib etməmiş bu danışıqlara qatılmalı deyildik:

“Daha öncə də bunu demişdim. Hesab edirəm ki, burada guya, Azərbaycan tərəfindən “biz həmişə danışıqlara hazırıq” oyunu aparılır. Amma danışıqlara hər zaman hazır olmaq düzgün deyil. Bu onu göstərir ki, öz mövqelərinin müdafiəsində Azərbaycan tərəfi israrlı deyil. Sərt bəyanatlar verilməlidir. Erməni tərəfi bu və ya digər şəkildə öz sözlərindən, mövqeyindən imtina etməlidir. Ya da danışıqların gündəmi olmalıdır. Hansı məsələlərin müzakirə olunacağı ilə bağlı konkret məlumat verilməlidir”.

T. Zülfüqarov istisna etmir ki, vasitəçilərdən hansısa, imitasiya  prosesinin davam etməsində maraqlıdır:

“Bu prosesdə boşluq yaranan kimi, Azərbaycan tərəfi və ictimaiyyəti müharibə barəsində danışmağa başlayacaq. Bunun olmasını istəməyən qüvvələr var. Bu oyunda kiməsə kömək etmək düzgün deyil. İlk növbədə Azərbaycan diplomatiyası həqiqi vəziyyəti əks etdirməlidir. Həqiqi vəziyyət də ondan ibarətdir ki, Ermənistan tərəfi danışıqlar yolu ilə işğal olunmuş əraziləri qaytarmayacaq. Bu həqiqəti demək lazımdır”.

Sabiq nazir danışıqların davam etdirilməsində Azərbaycana təsir olub-olmamasına da aydınlıq gətirib:

“Gəlin, məntiqli yanaşaq. Məntiq də ondan ibarətdir ki, müzakirə olunan məsələlər elan olunmur. Danışıqların hansı mövzularda aparılacağı deyilmir. Yaddaşda qalan və ciddi siyasi əks-səda yaradan Paşinyanın bəyanatlarıdır. İstər-istəməz belə bir təəssürat yaranır ki, Azərbaycan verilən bəyanatlar çərçivəsində danışıqlar aparmağa hazırdır. Yəni Paşinyanın bəyanatlarını qəbul edir. Bu, bizim mövqeyimizə ciddi ziyan vurur. Azərbaycan tərəfi bu danışıqlara qatılmamalıdır”.

T. Zülfüqarov bildirib ki, erməni tərəfi danışıqları demək olar teatra çevirib:

“Ermənistan tərəfi Azərbaycan torpaqlarını işğal edəndən sonra BMT-nin qətnamələri qəbul olundu. Amma bunlar nəticəsiz qalıb. İkincisi isə, Azərbaycan vasitəçilik üçün ATƏT-ə müraciət edib. Amma bu vasitəçilik heç bir ciddi nəticə vermir. Bu mövzunu ciddi şəkildə qaldırmaq lazımdır. Və açıq şəkildə vasitəçilərdən imtina edilməlidir”.

Xatırladaq ki, 23 sentyabrda Nyu York şəhərində Azərbaycan və Ermənistan Xarici İşlər nazirləri arasında ATƏT-in Minsk Qrupu həmsədrlərinin vasitəçiliyi ilə görüşün keçirilməsi nəzərdə tutulur.