Bu gün BMT QAK 1991-ci ildən 2000-ci ilədək BMT QAK-a rəhbərlik etmiş BMT-nin Qaçqınlar üzrə keçmiş ali komissarı Sadako Oqatanın vəfatı ilə əlaqədar dərin hüznlə bəyanat verib.
"Xanım Oqata BMT QAK-ın tarixindəki ən önəmli onilliklərdən biri ərzində ona rəhbərlik etmiş, milyonlarla qaçqının və müharibə, etnik təmizləmə və soyqırımı səbəbindən fəlakətə düçar olan digər insanların həyatını dəyişmiş və sürətlə dəyişən geosiyasi mühitdə humanitar fəaliyyətlərə yenidən baxılmasına yardım etmiş uzaqgörən siyasətçi idi", – deyə Ali Komissar Filippo Qrandi bildirib. "O, bütün həyatı boyu sadiq beynəlmiləlçi və Birləşmiş Millətlər Təşkilatının dostu olmuşdur".
Sadako Oqata soyuq müharibənin başa çatmasından az sonra ali komissar olmuşdur, həmin dövrdə qlobal siyasi mühitdə dərin dəyişikliklər baş vermiş və on milyonlarla insan didərgin düşmüşdür. Onun rəhbərliyi altında BMT QAK keçmiş SSRİ, İraq, Balkanlar, Somali, Böyük Göllər regionu və Şərqi Timordakı böhranlara reaksiya olaraq irimiqyaslı fövqəladə yardım əməliyyatları təşkil etmiş, habelə Mərkəzi Amerika, Asiya və Afrikada irimiqyaslı repatriasiya əməliyyatları çərçivəsində milyonlarla qaçqının evlərinə qayıtmasına kömək etmişdir.
Sadako Oqata 1999-cu ildə Azərbaycanda rəsmi səfərdə olmuş, Azərbaycan Respublikasının keçmiş prezidenti Heydər Əliyev tərəfindən qəbul edilmişdir. Səfər çərçivəsində o, sentyabrın 8-də Biləsuvar və Füzuli rayonlarında müvəqqəti məskunlaşmış məcburi köçkünlərlə də görüşmüşdür. Səfər zamanı Sadako Oqatanı BMT-nin qaçqınlar üzrə hazırkı ali komissarı Filippo Qrandi müşayiət etmişdir. Onun rəhbərliyi altında BMT QAK Dağlıq Qarabağla əlaqədar Ermənistanla münaqişə nəticəsində didərgin düşmüş on minlərlə məcburi köçkünün sığınacaq, zəruri istehlak malları, təhsil, su, sanitariya qovşağı və gəlir gətirən fəaliyyətlərlə təmin edilməsinə kömək etmiş fövqəladə proqramın həyata keçirilməsinə 1993-cü ildən başlamışdır.
Hörmətli yapon akademik və təcrübəli çoxşaxəli diplomat olan Oqata qaçqınlarla beynəlxalq həmrəyliyin yorulmaz müdafiəçisi olaraq didərginlik böhranlarının həllinin siyasi danışıqların və sülh proseslərinin tərkib hissəsini təşkil etməsini təmin edirdi. Ali Komissar qismində səlahiyyət müddəti bitdikdən sonra o, Birləşmiş Millətlər Təşkilatı ilə sıx əlaqəsini qoruyub saxlamış, 2003-cü ildən 2012-ci ilədək Yaponiya Beynəlxalq Əməkdaşlıq Agentliyinin (YBƏA) sədri vəzifəsini tutduğu dövrdə "insan təhlükəsizliyi" anlayışından və inkişafa ayrılan yardımlardan didərginlik probleminin həllinə köməklik üçün istifadə edilməsi təşəbbüsünü irəli sürmüşdür.
Bəyanatın sonunda BMT-nin Qaçqınlar üzrə Ali Komissarı Filippo Qrandi Sadako Oqatanın ailəsinə dərin hüznlə başsağlığı verib.
