Politoloq, ictimai xadim, CBC-də Qlobal Müzakirə siyasi televiziya şousunun aparıcısı və Beynəlxalq Avrasiya Mətbuat Fondunun Prezidentinin köməkçisi Anastasiya Lavrina Azərbaycan Rus İcmasının beşinci qurultayında açıq səsvermə yolu ilə Azərbaycan Rus İcması sədri Milli Məclisin deputatı Mixail Zabelinin müavini seçilib.
Eurasia Diary xəbər verir ki, dekabrın 14-də hakim Yeni Azərbaycan Partiyasının mərkəzi ofisinin akt zalında keçən beşinci qurultayda Respublika Birliyi Şurasının yeni tərkibi və rəhbərliyi seçilib. Təşkilatın rəhbəri Mixail Zabelin yenidən Azərbaycan Rus İcmasının sədri seçilib. Respublika Şurasına 21 nəfər daxil olub. Onlardan biri də Anastasiya Lavrinadır.
A.Lavrina Rus İcmasının Qaradağ təşkilatının təmsilçisi qismində Azərbaycan Rus İcmasının Beşinci Qurultayının nümayəndələri adından Azərbaycan Respublikasının Prezidenti İlham Əliyevə müraciət edib. Müraciətdə iki müstəqil dövlət - Azərbaycan və Rusiya arasındakı sərbəst strateji tərəfdaşlıq çərçivəsində zamanın sınağından keçmiş dostluq münasibətlərinin əhəmiyyəti qeyd edilib. Həmçinin, özünü Azərbaycan xalqının ayrılmaz hissəsi hesab edən Rusiya xalqının onunla uğur və çətinlikləri bölüşdüyünü, millətindən və dinindən asılı olmayaraq, bütün vətəndaşların bərabər olduğu, mədəniyyətlərini, həyat tərzini, dilini, adət və ənənələrini qorumaları üçün əlverişli şəraitin yaradıldığı bir ölkə qarşısında məsuliyyət hiss etdikləri də diqqətə çatdırılıb.
Rus əsilli Anastasiya Lavrina Azərbaycanda anadan olub və böyüyüb. Böyük Britaniya və Polşada ikili diplom proqramını bitirdikdən sonra ADA Universitetindən diplomatiya və beynəlxalq münasibətlər ixtisası üzrə ikinci magistr dərəcəsi almışdır. A. Lavrina vətəndaş cəmiyyətinin inkişafı və inteqrasiya, sosial, təhsil və humanitar layihələrin həyata keçirilməsində, gənclərlə işləmək və gender bərabərliyi məsələlərini təbliğ etməkdə geniş bilik, bacarıq və təcrübəyə malikdir. Həm Azərbaycanda, həm də xaricdə nəşr olunan bir sıra məqalələrin və elmi işlərin müəllifidir.
Bir sıra beynəlxalq proqramlarda, o cümlədən Avropa Parlamentinin və Birləşmiş Millətlər Təşkilatının təşkil etdiyi tədbirlərdə iştirak edən A. Lavrina dəfələrlə yüksək tribunalarda çıxış edərək dünya ictimaiyyətinə Azərbaycan, tarix, mədəniyyət və Ermənistan-Azərbaycan, Dağlıq Qarabağla bağlı həqiqətləri dünya ictimaiyyətinin diqqətinə çatdırıb.
İctimai fəaliyyətlə yanaşı, A. Lavrina Azərbaycanın CBC kanalında "Qlobal Müzakirə" ictimai-siyasi proqramının müəllifi və aparıcısıdır. Proqramda dünya siyasəti və Azərbaycanla birbaşa bağlı olan hadisələr müzakirə olunur. Müzakirələrdə bütün dünyadan tanınmış siyasətçilər, diplomatlar, ekspertlər, politoloqlar, jurnalistlər və iş adamları iştirak edirlər.
2016-cı ildən bu günə qədər Birləşmiş Millətlər Təşkilatının İqtisadi və Sosial Şurası yanında ümumi məşvərətçi statusuna malik beynəlxalq qeyri-hökumət təşkilatı Beynəlxalq Avrasiya Mətbuat Fondu prezidentinin köməkçisi kimi çalışır. Bu vəzifədə olduğu müddətdə A. Lavrina, Bakıda və Azərbaycanın cəbhə bölgələrində erməni təcavüzünə məruz qalan yaşayış məntəqələrində uşaqlara kömək məqsədilə gender bərabərliyi və vətəndaş cəmiyyətinin inkişafı ilə əlaqədar bir sıra humanitar və təhsil layihələrinin təşəbbüskarı kimi çıxış edib.
Xatırladaq ki, Rusiya İcmasının beşinci qurultayında ölkənin bütün bölgələrindən 250-dən çox nümayəndə, həmçinin Azərbaycan Prezidenti Administrasiyasının humanitar siyasət, multikulturalizm və diasporla əlaqələr şöbəsinin müdir müavini Məhərrəm Əhmədov, Milli Məclisin deputatları Arif Rəhimzadə, Əli Hüseynli, Rusiyanın Azərbaycandakı səfiri Mixail Boçarnikov, Rusiya Federasiyası Prezidentinin xarici ölkələrlə regionlararası və mədəni əlaqələr idarəsi rəhbərinin müavini Anton Rıbakov, Rusiya Federasiyası Dövlət Dumasının deputatı, Rusiya-Azərbaycan Parlamentlərarası Dostluq qrupunun rəhbəri Dmitri Savelyev, Bakı və Azərbaycan arxiyepiskopu Aleksandr və başqaları iştirak edib.