Yanvarın 17-də Milli Məclisə növbədənkənar seçkilərlə əlaqədar namizədliyi qeydə alınmış şəxslərin seçkiqabağı təşviqat kampaniyası başlayıb.
Eurasia Diary xəbər verir ki, Prof. Vəsilə Hacıyeva 9 fevral 2020-ci ildə keçiriləcək parlament seçkilərində 34 saylı Xətai ikinci dairəsindən namizədliyini irəli sürmüşdür.
Vəsilə Hacıyeva haqqında məlumatı sizə təqdim edirik:
Vəsilə Hacıyeva Cümşüd qızı 1969-cu ildə Bakı şəhərində ziyalı ailəsində doğulub. 1986-cı ildə 171 saylı orta məktəbi, 1991-ci ildə Azərbaycan Texniki Universitetini bitirərək sistem mühəndisi ixtisasına yiyələnmişdir. Tələbəlik dövründə siyasətə olan böyük marağı sonradan onun siyasətşünas kimi formalaşmasına təkan olmuş və hazırda siyasi elmlər üzrə elmlər doktoru, professordur. 1991-ci ildə Bakı Kompüter Litseyində başlayan pedaqoji fəaliyyəti AzUn, BDU, Qərb Universitetində davam etmiş, dosent, professor, Xarici əlaqələr şöbəsinin müdiri və Elmi işlər üzrə prorektor vəzifələrində çalışmışdır. Fəaliyyəti dövründə saysız-hesabsız gənc siyasətşünaslar yetişdirmişdir. Avropa İttifaqının Erasmus Mundus EFFORT layihəsinin Azərbaycan üzrə kordinatoru olmuş Vəsilə Hacıyeva azərbaycanlı tələbə və müəlimləri, gənc tədqiqatçıları Avropa universitetlərinə təhsil və tədqiqat üçün göndərmiş, onun rekomendasiyası ilə bir çox azərbaycanlı gənc təhsilini Amerikada və Avropada davam etdirmişdir. ABŞ-ın Harvard Universitetində və Avstriyanın Karl Franzens Graz Universitetində dəvətli alim olaraq, elmi tədqiqatla məşğul olmuşdur. Vəsilə Hacıyeva Amerika, Avropa və Türkiyədə açıq seminarlar keçirmişdir. Azərbaycan milli maraqlarını siyasi elmi dairələrdə elmi şəkildə əsaslandırmışdır. Beynəlxalq Siyasi Elmlər Assosiasiyası, Amerika Siyasi Elmlər Assosiasiyası, Qafqaz üzrə Avropa Tədqiqatları Assosiasiyası daxil olmaqla bir sıra nüfuzlu beynəlxalq təşkilatların üzvü olmuş, Avropa və ABŞ-da mötəbər beynəlxalq konfranslarda elmi məruzələrlə çıxış edərək, Azərbaycanı beynəlxalq səviyyədə ən mötəbər və hörmətli şəkildə təmsil etmişdir. Vəsilə Hacıyevanın elmi əsərləri Azərbaycan ali məktəblərində politoloq kimi yetişən bütün gənclərin bilik mənbəyidir. Əldə etdiyi elmi nəticələr və təkliflər Azərbaycanda ədalətli və dinamik siyasi sistemin formalaşmasına, milli təhlükəsizliyin möhkəmlənməsinə xidmət edir. Elmi işləri ABŞ, Türkiyə, Rusiya, Qazaxıstan və Azərbaycanda çap olunmuş, bəziləri isə Harvard Universitetinin akademik arxivinə daxil edilərək, universitetin saytında yayınlanır. İngilis, rus və türk dillərində səlis danışır.
