Xəbər verdiyimiz kimi son dövrlər Azərbaycan Respublikası Prezidentinin Administrasiyasının Siyasi partiyalar və qanunvericilik hakimiyyəti ilə əlaqələr şöbəsinin müdiri Ədalət Vəliyev partiya rəhbərləri ilə görüşlər keçirir, bir sıra əməkdaşlıq imkanları barədə müzakirələr aparır.
Ədalət Vəliyev bu günə qədər 11 siyasi partiya rəhbəri ilə görüşüb. Qeyd edək ki, görüşlərdə siyasi partiyalar və dövlət münasibətləri, siyasi partiyalar, ictimai – siyasi vəziyyət, iqtidar – müxalifət münasibətləri mövzusunda diskusiyalar aparılıb.
Eyni zamanda Prezident İlham Əliyev Milli Məclisin ilk plenar iclasının açılışındakı çıxışında partiyalara “siyasi dialoq” mesajı verib.
Bəs siyasi partiyalarla iqtidar nümayəndələrinin ardıcıl görüşlərinin arxasında nə durur? İqtidarın başlatdığı siyasi dialoq strategiyasının yekun hədəfləri nələrdir?
Bu və digər suallarımıza Beynəlxalq Avrasiya Mətbuat Fondunun prezidenti, Mətbuat Şurasının sədr muavini Umud Mirzəyev cavab verib:
“Ümumiyyətlə, son dövrlər dövlət başçısı İlham Əliyevin rəhbərliyi ilə həyata keçirilən islahatlar kampaniyası demək olar ki, hər sahədə müsbət nəticələr verir. İslahatlar nəticəsində həm mərkəzi, həm də yerli icra strukturlarında yenilənmə hiss olunur. Yenilənmə sadəcə strukturlara rəhbərlik edən kadrlarda deyil, eyni zamanda strukturların fəaliyyətində də müşahidə edilir. Sözügedən görüşlər də məncə, islahatların siyasət müstəvisindəki təzahürüdür və siyasi dialoq strategiyası da bu islahatların tərkib hissəsidir.
İslahatlar əsasında administrasiyada Siyasi partiyalar və qanunvericilik hakimiyyəti ilə əlaqələr şöbəsinin yaranması və bu şöbənin rəhbərliyinə Ədalət Vəliyev kimi təcrübəli, zəngin tərcümeyi-hala sahib, peşəkar bir kadrın təyin edilməsi təsadüfi deyildi”- deyə U. Mirzəyev əlavə edib.
U. Mirzəyev həmçinin partiya liderləri ilə hökumət nümayəndələrinin görüşünün ölkədaxili siyasi və milli həmrəyliyə töhfə verəcəyinə inandığını bildirib:
“Ə.Vəliyevin bu günədək siyasi partiya liderləriylə görüşməsi və ölkə problemləriylə bağlı müzakirələr aparmasını yüksək qiymətləndirirəm və düşünürəm ki, bu görüşlər ölkədaxili siyasi hərməyliyə öz töhfəsini verəcək. Prezidentin qeyd etdiyi ölkədaxili siyasi dialoq mühitinin formalaşdırılması üçün bu tipli görüşlər xüsusi əhəmiyyət daşıyır. Ə.Vəliyevin təcrübəsi və şəxsi keyfiyyətləri bu görüşlərin uğurlu və davamlı olmasını təmin edəcək”.
Hökumətin siyasi partiyalarla dialoq mühitini formalaşdırması və partiya liderləri ilə hökumət nümayəndələrinin ardıcıl görüşməsinin arxasında duran səbəbləri U.Mirzəyev belə izah edib:
“Prezident İlham Əliyev Milli Məclisdəki çıxışında Azərbaycandakı siyasi sistemin möhkəmləndirilməsinin zəruri olduğunu vurğulamışdı. Düşünürəm ki, bu görüşlər və ümumilikdə dialoq mühiti də bu məqsədə, yəni, Azərbaycan siyasi sistemini möhkəmləndirib dayanıqlılığını artırmağa, siyasi sabitliyi qoruyub saxlamağa istiqamətlənib. Dövlət başçısının da qeyd etdiyi kimi bu gün Azərbaycanın müstəqil siyasət yürütməsini həzm edə bilməyən qüvvələr var. Bu qüvvələrin təxribatlarına, müstəqilliyimizə qarşı təhdidlərinə qarşı effektiv müqavimət göstərmək üçün bizim dialoqa, həmrəyliyə ehtiyacımız var. Ona görə də düşünürəm ki, iqtidarın dialoq çağırışına siyasi partiya rəhbərləri müsbət reaksiya verməli və milli maraqlar çərçivəsidə hökumətlə əməkdaşlıq etməlidirlər”.
“Həmçinin hökumətin dialoq mühitini başlatmaqda ikinci bir hədəfi prezident İlham Əliyevin də qeyd etdiyi kimi “yeni beşinci kalon”ların yaranmasının qarşısını almaqdır. Prezident parlamentdəki çıxışıyla son dəfə ölkə daxilindəki siyasi qüvvələrə çağırış etdi və açıq şəkildə bildirdi ki, ölkədaxili problemlər ölkə daxilində həll edilməlidir, bunları xaricə daşımaq, xarici qüvvələrlə Azərbaycan dövlətçiliyi əlehinə birgə fəaliyyət göstərmək dövlətə və vətənə xəyanətdir. İqtidar bu xəbərdarlıq və çağırışla bütün siyasi qüvvələrə “gəlin problemlərimizi birgə həll edək” mesajını verdi. Mənim fikrimcə, nəyinki siyasi partiyalar, hətta vətəndaş cəmiyyəti insitutları da bu prosesə qoşulmalıdırlar. Çünki ölkəmizin bütün problemlərinin, o cümlədən, Dağlıq Qarabağ probleminin həlli milli həmrəylik və dialoqdan asılıdır” – deyə BAMF prezidenti qeyd edib.
