Ermənistanda “küçə demokratiyası”nın qələbəsi ilə hakimiyyətə gəlmiş səriştəsiz və avantürist baş nazir Nikol Paşinyanın özündən əvvəl 20 il hakimiyyətdə olmuş “Qarabağ klanı”na qarşı apardığı total mübarizə işğalçı ölkədə siyasi mübarizəni getdikcə daha da dərinləşdirir. Azərbaycanın işğal olunmuş ərazilərinin dağlıq hissəsində yaradılmış oyuncaq-separatçı rejimin rəhbərliyinə qarşıdan gələn seçki bu qarşıdurmanı son həddə çatdırmışdır. Paşinyan hakimiyyəti “DQR” pezidentliyinə öz adamını yerləşdirməklə Dağlıq Qarabağda mövcudluğunu hələ də davam etdirən “Koçaryan-Sarkisyan klanı”nın son qalasını da özünə tabe etməyi qarşısına əsas məqsəd qoyub. “Qarabağ klanı” isə bu seçkidə öz namizədinin qələbəsinə Ermənistanda hakimiyyətə qayıtmağın son şansı kimi baxır.
Dağlıq Qarabağ oyuncaq rejiminin “prezident”liyinə namizəd, keçmiş səhra komandiri, general-mayor Vitali Balasanyan seçkiqabağı görüşlərində verdiyi bəyanatlarla Paşinyan hakimiyyətinin siyasətinin Dağlıq Qarabağın itirilməsi ilə nəticələnəcəyi barədə bəyanatları ilə Ermənistanda və Azərbaycanın işğal olunmuş ərazilərindəki erməniləri vahiməyə salmaqda davam edir. Əli soydaşlarımızın qanına batmış quldur dəstəsinin başçısı Şuşa rayonunun işğal altındakı Daşaltı kəndindəki görüşündə bildirib: “Martın 31-də Qarabağ məsələsinin həll olunub-olunmayacağı bilinəcək. Əgər Ermənistan siyasi hakimiyyəti inqilabı Qarabağa gətirsə, hamımız məğlub olacağıq. Bu, Balasanyanın problemi deyil, bu, “Artsax”ın ( Qarabağın--T.A.) problemidir”.
V. Balasanyan Ermənistan və Azərbaycan Xarici işlər nazirlərinin görüşü ilə paralel olaraq, ABŞ-ın Azərbaycandakı səfirinin Qarabağın Azərbaycanlı İcmasının nümayəndəsi ilə görüşdüyünü, Məmmədyarov--Mnatsakanyan görüşündə “ermənilərlə azərbaycanlıların birgə yaşama məsələsinin” müzakirə edildiyini xatırladıb: “Mən bir açıqlama verim ki, Ermənistan Xarici İşlər Nazirliyinin sözçüsü mənim 31 mart “seçki”ləri üçün siyasi divident topladığımı bildirir. Mən hansı siyasi divident əldə edirəm? Mən hərbçiyəm”.(Xalq qəzeti)