İran və Pakistan sərhəddinə nəzarətin itirilməsi təhlükəsizlik problemləri yaradır. Son illərdə hər iki tərəfin səlahiyyətliləri tərəfindən təhlükəsizliyin qorunmasına dair ümumi yanaşma mövcuddur.
İqor Pankratenko Rusiya Strateji Qiymətləndirmə və Proqnozlar Mərkəzi sədrinin müavinidir.
O, bu bölgəni sosial və iqtisadi cəhətdən inkişaf etməmiş, sivilizasiyadan uzaq "vəhşi ərazi" adlandırıb:
"Bunda bölgədə məskunlaşan qəbilənin də rolu az deyil. Yoxsulluğun yüksək həddə olmasından əlavə sanki burada zaman durub. Nəticədə, qaçaqmalçılar, narkotik ticarəti, ekstremizm və separatizm üçün əlverişli şərait yaranıb”, -deyə Pankratenko əlavə edib.
O bildirib ki, Bəlucistan ekstremist sünni qruplaşmaların həyata keçirdiyi narkotik ticarəti, qaçaqmalçılıq və terrorçu fəaliyyətlər üçün əlverişli tranzit bölgədir. Separatçıların şüarı "vahid və bölünməz Böyük Bəlucistan"dır.
Bu işdə məsuliyyət daşıyan tərəfin kim olduğu sualına cavabında İ. Pankratenko hər iki tərəfin məsuliyyət daşıdığını bildirib.
“Mən bu problemi "Pakistanın” və ya “İranın” problemi olaraq ayırmazdım. Səylərə gəlincə, burada sərhədlərin qorunması fərqli üsullarla həyata keçirilir. Pakistan mühafizəçi patrul dəstələrindən istifadə edir, İran isə sərhəd boyunca 700 kilometrə qədər uzanan qalınlığı bir metr və üç metr hündürlüyündə beton divardan ibarət mühəndis istehkam sistemini qurur".
Politoloqun sözlərinə görə, İran və ya Pakistan sərhədçiləri cinayətkarları təqib etmək üçün qonşu ölkənin ərazisinə 10 kilometrə qədər daxil olmaq barədə razılığa gəlməyə hazırdır və daim buna hazır olduqlarını nümayiş etdirirlər.
“Tehran və İslamabad arasında sərhəd mübahisələri və ərazi iddiaları yoxdur. Bu o deməkdir ki, sərhədlərini sıx qarşılıqlı əlaqələr vasitəsilə qorumaq niyyətindədirlər”, -deyə İqor Pankratenko fikrini tamamlayıb.
Müsahibəni aldı: Ülvi Əhmədli
Tərcümə etdi: Gülnar Səlimova