Məşhur video blogger Fuad Abbasov İlham Əliyevlə Nikol Paşinyan arasındakı müzakirə barədə video paylaşıb. O, Ramil Səfərovla Varujan Karapetyan arasında müqayisəli təhlil aparıb.
EDNews.net-in məlumatına görə, Varujan Karapetyan 80-ci illərin əvvəllərində ASALA terror təşkilatının Fransa qruplaşmasına rəhbərlik edib. 1983-cü ildə onun başçılığı ilə Fransanın Orli hava limanında törədilmiş terror aktı nəticədində 8 nəfər həlak olub, 61 nəfər yaralanıb. Ömürlük həbs cəzasına məhkum edilsə də, 2001-ci ildə Ermənistana ekstradisiya olunub. Terrorçu İrəvanda “xalq qəhəmanı” kimi qarşılanıb. Ermənistanın baş naziri onu hava limanında şəxsən qarşılayıb və çox keçməmiş terrorçu Karapetyan mənzil və işlə təmin olunub.
Fuad Abbasov Ramil Səfərovun Budapeştdə erməni hərbçisi Qurgen Marqoryanı guya yatarkən öldürməsi barədə yayılan şayələrə də aydınlıq gətirib. O məhkəmə materiallarında da R.Səfərovun erməni hərbçisini yatarkən öldürmədiyinə dair məlumatların yer aldığını deyib. “Ramil Səfərov erməni hərbçisinə yaxınlaşıb və macar hərbçidən otaqdan çıxmasını xahiş edib. Diktafonla erməni hərbçisi Qurgen Marqoryana yaxınlaşaraq ondan üzr istəməsini istəyib. Belə ki, Q.Marqoryan hər gün Azərbaycan xalqını təhqir əlaməti olaraq Azərbaycan bayrağı ilə öz ayaqqabısını silirdi. O diktafonla Marqoryanın səsini yazıb və ondan üzr istəməsini tələb edib. Məsələnin ciddi olduğunu görən erməni onu bağışlaması üçün yalvarmağa başlayıb və bunu zarafat üçün etdiyini deyib. Ramil iki ölkə arasında müharibənin olduğunu və bunun zarafat olmadığını bildirib. Marqoryan yalvarıb, Qarabağ və ətraf rayonları işğal etdiyi üçün öz erməni dövlətinin və xalqının ünvanına təhqiramiz ifadələr işlədib. Ramil Səfərov isə dövlətinin bayrağını təhqir edən və həyatı üçün təhlükə yarandığını görəndə öz dövlətinə, xalqına xəyanət edən bir insanın yaşamağa haqqı olmadığını düşünərək bu əməli törədib", -deyə F.Abbasov bildirib.
Qeyd edək ki, Orli faciəsi nəticəsində dünyasını dəyişən 8 nəfərdən 2-si türk, 4-ü fransız, bir isveçli və bir amerikanlı olub. Terror aktının əsas təşkilatçısı və terrorçu dəstənin başçısı Suriya ermənisi olan Varujan Karapetyan həbs edilib və Parisdə baş tutan məhkəmənin sonunda ömürlük həbs cəzasına məhkum edilib. Həbsindən 17 il sonra erməni tərəfinin müraciətlərinə cavab olaraq, rəsmi Paris onu 2001-ci ildə azadlığa buraxaraq Ermənistana ekstrasiya edilib.
Karapetyan oz günahını boynuna alaraq istintaqa verdiyi ifadələrdə bildirmişdi ki, içində bomba olan çemodan hava limanında Türk hava yollarının kassasının qarşısında yox, təyyarənin içində təyyarə göydə olarkən partlamalı imiş. Onun başçılıq etdiyi terrorçu qrup Türk hava yollarının Türkiyə xüsusi xidmət orqanlarının, eləcə də general və diplomatlarının uçmalı olduqları təyyarəsini partlatmağı planlaşdırmışdı. Lakin onların planı baş tutmayıb və bomba vaxtından əvvəl partlayıb. Fransada o zaman iqtidarda olan və erməni terrorçularına simpatiyasını gizlətməyən sosialistərin təşkil etdiyi hökumət Orlidəki terror aktından sonra, terrorçulara qarşı müəyyən tədbirlər görmək məcburiyyətində qalmışdır. Beynəlxalq mətbuatda isə Fransa hökuməti ilə terrorçular arasında sövdələşmənin olduğu barədə məlumatlar yayılmışdır.
Sonralar Terrorçu Karapetyan tez-tez müsahibələr verir, terrorçu təşkilat ASALA-nın yığıncaqlarında iştirak edir. O, həmçinin Ermənistanda universitetərdə çıxış edərək yetişməkdə olan yeni terrorçularla təcrübəsini bölüşür. 2017-ci ildə Ermənistan Dövlət Universitetində tələbələr qarşısında çıxış edərkən deyib ki, törətdiyi əməldən peşman deyil və bunu yenə də edərdi. Varujan Karapetyan 2019-cu ildə, 65 yaşında ürək xəstəliyindən ölüb.
