12-13 İyul tarixlərində Azərbaycan-Ermənistan sərhəddinin Tovuz rayonu istiqamətində Ermənistan və Azərbaycan hərbi qüvvələri arasında güclü toqquşmalar müşahidə olunub. Gərgin vəziyyət hələ də davam edir. Azərbaycan Müdafiə Nazirliyindən verilən məlumata görə, Azərbaycan ordusu sərhəddə vəziyyəti nəzarət altına ala bilib və layiqli cavabla düşmən qüvvələrini geri otuzdurub. Erməni hərbi qüvvələrinin Azərbaycan mövqeylərinə hücumu nəticəsində dörd Azərbaycan əsgəri şəhid olub və dördü isə yaralanıb.
Ermənistan hərbi qüvvələrinin Azərbaycan mövqelərinə qarşı hücumu barədə ictimaiyyət arasında müxtəlif rəylər dolaşır, vəziyyətlə bağlı politoloqlarımız və siyasətçilərimiz müxtəlif fikirlər səsləndirirlər. Belə bir fikir də var ki, Ermənistan bu təxribatı yaratmaqla Rusiyanın və KTMT-nin diqqətini özünə yönəltmək istəyir.
Məsələ ilə bağlı siyasi analitik Rəhim Rəhimov EDNews.net-ə açıqlamasında vəziyyəti qısa və dəqiq şəkildə şərh edib.
“Erməni hökümətinin yekcins olmadığı və öz aralarında fikir və yanaşma ixtilafları olduğu üçün bu son hadisədə onların niyyətlərini birmənalı qiymətləndirmək doğru deyil. Hazırki şəraitdə və bu kontekstdə Paşinyan höküməti ifadəsi bir az diqqətli işlədilməlidir. Çünki bu hökümət yekcins deyil. Xüsusən də Baş Nazir Nikol Paşinyanla Müdafiə naziri David Tonoyan arasında münasibətlər göründüyü qədər rəvan deyil,” - deyə Rəhimov bildirib.
Siyasi analitik sərhəddə baş verənləri daha çox Tonoyanın dəsti-xətti ilə əlaqələndirib.
“Tonoyan yeni nəsil qərb təhsilli erməni zabitidir və NATO sistemindən yaxşı xəbərdardır, həmçinin mental baxımdan NATO hərbi düşüncəsinə daha yaxındır. Amma Rusiya ilə müttəfiqliyi Ermənistan üçün son dərəcə önəmli hesab edir. Yəni taktiki baxımdan NATO yanaşmalarını tətbiq etmək, strateji baxımdan isə Rusiya ilə müttəfiqliyi inkişaf etdirmək Tonoyanın baxışının xarakterik xüsusiyyətləridir. Bu iki xüsusiyyət də son hadisədə öz ifadəsini tapır,” – deyə Rəhimov qeyd edir.
Rəhim Rəhimov həmçinin Ermənistanın sərhəddə törətdiyi təxribatın hansı məqsədə xidmət etdiyinə də toxundu.
“Burada strateji hərbi-siyasi müttəfiq kimi Rusiyanın və KTMT-nin diqqətini çəkmək niyyəti sözsüz ki, var və önəmlidir. Lakin mənim fikrimcə, Ermənistan bu addımı atmaqla heç də az əhəmiyyətli olmayan digər niyyət diqqəti Qarabağdan və digər işğal olunmuş ərazilərindən Ermənistan-Azərbaycan sərhəddinə yönəltmək istəyir. Bunlardan əlavə isə qəfləti hücumla Azərbaycan tərəfə psixoloji təsir etmək və güc göstərmək məqsədi güdülür,” deyə siyasi analitik əlavə edib.
Rəhim Rəhimov beynəlxalq münasibətlər üzrə siyasi analitikdir.
Yunis Abdullayev
