Xocalı faciəsi erməni silahlı birləşmələri tərəfindən Azərbaycan xalqına qarşı törədilmiş ən amansız qətliamdır. Ermənilər qadın, uşaq və qoca demədən dinc əhaliyə qarşı etnik mənsubiyyətinə görə soyqırım törətmişdir.

Bu hadisə sadəcə yerli mətbuatda deyil, eyni zamanda xarici mətbuatda da işiqlandırılıb və oxucuları təsirləndirib. Belə ki, ABŞ-ın məşhur "New York Times" qəzeti baş vermiş faciəni geniş şəkildə xarici oxucuların diqqətinə çatdırıb.

Xocalı faciəsindən 10 gün sonra 8 Mart tarixində ABŞ qəzeti soyqırımla bağlı məqalə yayınlayır. Bu məqalədə SSRİ dağıldıqdan sonra Qarabağda yaşayan erməni icmasının müstəqillik uğrunda Azərbaycan xalqını necə öz torpaqlarından didərgin salması qeyd edilir.

Məqalə eyni zamanda Xocalı faciəsi zamanı yüzlərlə azərbaycanlının qətli və onların talana, zorakılığa və əsirliyə məruz qalmağından bəhs edir.

“Ermənistan tərəfi bu münaqişədə iştirakçı tərəf olduğunu rədd etsə də, onların cəmiyyəti və siyasətçilərinin regiona iddiaları heç də Azərbaycan tərəfindən az deyil”, qəzet yazır.

New York Times qeyd edir ki, Azərbaycan tərəfi münaqişədə Rusiyanın erməni silahlı dəstələrinə yardım etdiyini iddia edir, bu iddia Rusiya rəhbərliyi tərəfindən inkar edilsə də bəzi rus əsgərləri Azərbaycanın iddiasının doğruluğunu təsdiqləyir.

ABŞ nəşri eyni zamanda faciə zamanı sağ qalan insanların fikirlərinə də yer verir.

“Onlar bizim evə gəldilər və dedilər ki, qaçın, yoxsa yandırılacaqsınız”, əli yaralı 11 yaşlı Xocalı qaçqını Əhməd Məmmədov söyləyir.

“Onlar ətrafdakı hər şeyi dağıdırdılar və qumbara ataraq nənəmlə anamı yaraladılar. Mən başqa qumbaranın xəsarətindən Natavan Üsubovanın və onun anasının öldüyünü gördüm,” Əhməd 4 yaşlı balaca qızı nəzərdə tutaraq dedi.

Məqalə Frensis Kleyn tərəfindən yazılıb.