Ermənistan Baş naziri Nikol Paşinyan BBC-nin Hard Talk proqramının aparıcısı Stefan Sakurun ona ünvanladığı çətin suallar qarşısında aciz qalıb.
Stefan Sakur Paşinyanın liderlik etdiyi Məxməri inqilabın erməni xalqının ümidlərini doğrultmadığını bildirib. Ermənistan Baş naziri isə 2019-cu ildə Avropada ən böyük iqtisadi artımın Ermənistanda müşahidə olunduğunu və ölkəsinin demokratiya sahəsində reytinqlərdə ön sıralarda olduğunu deməklə gülünc vəziyyətə düşüb.
Sakur Ermənistan hökumətinin pandemiya ilə mübarizədə alınan nəticələrin uğursuz olduğunu qeyd edib. Ötən ayda Azərbaycanla sərhəddə baş verən qarşıdurmaya toxunan aparıcı Paşinyanın hakimiyyətə gəldiyi zaman sülhə dair verdiyi vədlərin tam əksinin şahidi olduğunu deyib. Paşinyan sualdan yayınmağa çalışarkən o, Azərbaycan tərəfindən 17 hərbçinin və bir mülki vətəndaşın öldürüldüyünü qeyd edərək Ermənistan xarici siyasətinin sülhə köklənmədiyini bildirib.
O, Paşinyanın 2019-cu ilin avqust ayında Xankəndində çıxışı zamanı qondarma “dqr”in Ermənistana birləşdirilməsinə dair çağırışını xatırladaraq, bunun Azərbaycana qarşı açıq-aşkar təxribat olduğunu deyib. Aparıcı tarixi yalanları ilə özünə bəraət qazanmağa çalışan Paşinyana reallığa qayıdaraq Ermənistan silahlı qüvvələrinin Azərbaycanın işğal olunmuş ərazilərindən qeyd-şərtsiz çıxarılmasını tələb edən BMT qətnamələrini xatırladıb və bu qətnamələrə qarşı çıxmaqla Ermənistanın sülhməramlı olmadığı bildirib.
Paşinyan hökumətinin Ermənistandan cənub xətti üzrə Azərbaycan ərazisində olan Dağlıq Qarabağa yol çəkməyi planlaşdırdığına toxunan BBC-nin aparıcısı Avropa Parlamentinin bir qrup deputatının bu planı araşdırdığını və bunun beynəlxalq hüququn pozuntusu olduğunu deyib.
O, əvvəlcə bir neçə dəfə Xocalı sakinlərinin qətlə yetirilməsində Azərbaycan müxalifətini günahlandıran qəsd nəzəriyyəsini təkrarlayıb və bununla da, o, cinayəti açıq şəkildə rədd edən ilk erməni lideri olub.