Ermənistan Baş naziri Nikol Paşinyanın beynəlxalq xəbər telekanallarındakı uğursuz çıxışlarından sonra Xarici İşlər naziri Zöhrab Mnatsakanyan da bu ənənəni davam etdirir. Eurasia Diary xəbər verir ki, Almaniyanın “Deutsche Welle” telekanalında yayımlanan "Conflict Zone" verilişinə dəvət olunan erməni nazir, aparıcı Sara Kellinin konkret suallarına cavab verməkdə çətinlik çəkib.
Aparıcı, de-fakto etnik ermənilərin, beynəlxalq ictimaiyyət tərəfindən isə de-yure olaraq Azərbaycan ərazisi kimi tanınan mübahisəli ərazi Dağlıq Qarabağdakı müharibədə atəşkəs elan olunmasına baxmayaraq, ağır döyüşlərin getdiyini, yüzlərlə ölü sayının olduğunu qeyd edərək Ermənistan və onun dəstəklədiyi qüvvələrin buna görə hansı məsuliyyəti daşıdığını soruşub.
S. Kelli atəşkəsdən sonra və gecə radələrində Ermənistan tərəfindən Azərbaycanın ikinci ən böyük şəhəri olan Gəncəyə edilən hücum nəticəsində 14 nəfərin həlak olması faktına diqqət çəkib.
O, atəşkəsin pozulmasını sadəcə tərəflər arasında atışmaların davam etməsilə əsaslandırmağa çalışan Mnatsakanyana qarşılıqlı ittihamlar zamanı tərəflərdən mütləq birinin yalan danışdığını söyləyib.
Daha sonra Mnatsakanyana Ermənistan baş nazirinin atəşkəsdən sonra ilk çıxışında müharibəni sonadək davam etdirəcəklərinə dair açıqlamasını xatırladıb.
S. Kelli qeyd edib ki, “hətta tərəfdaşınız Rusiya və Xarici İşlər naziri Sergey Lavrovun vasitəçiliyilə əldə edilmiş atəşkəsə dair razılaşmanı pozmağınız göstərir ki, siz ciddi sülh danışıqlarına hazır deyilsiniz”.
Ermənistan xarici işlər naziri veriliş boyu gətirilən bütün faktlar və verilən suallar qarşısında müharibəni erməni xalqının mövcudiyyəti və təhlükəsizliyi ilə bağlamağa çalışsa da, bu, inandırıcı olmayıb.
Aylardı gərginliyin davam etdiyini vurğulayan aparıcı bir il öncə Paşinyanın Qarabağa gələrək, bu ərazilərin Ermənistana birləşdirilməsindən danışmasının, “Qarabağ Ermənistandır və nöqtə” deməsinin, Qarabağla Ermənistanı birləşdirən üçüncü avtomobil yolunun çəkilməsinin təxribat olduğunu və müharibəni təşviq etdiyini bildirib.
S. Kelli, Azərbaycan hökuməti ilə razılaşdırılmadan, işğaldan öncə daha çox azərbaycanlıların məskunlaşdığı Şuşada inaqurasiya mərasimin keçirilməsinin təxribat kimi qəbul edildiyini, Paşinyanın da orada iştirakı ilə oda benzin tökdüklərini və Avropa İttifaqının bu seçkiləri legitim saymadığını xüsusi vurğulayıb.
O, həmçinin erməni nazirə hər zaman sülh danışıqlarında 7 rayonun qaytarılmasını yerinə yetirməkdən imtina edən Ermənistan üçün ərazilərin sülhdən vacibmi olduğunu sual edib.
Aparıcı hazırda münaqişədə Türkiyənin Azərbaycana mənəvi dəstək olduğunu, Rusiyanın neytrallığını əsas gətirərək Ermənistanın regionda dostunun olmaması və izolyasiya olunma təhlükəsi ilə üzləşməsinə işarə edib.
Daha ətraflı video materialda:
