Avropa Şurası Parlament Assambleyasında Ermənistan nümayəndə heyətinin üzvü Vladimir Vardanyan AŞPA tribunasından Azərbaycanı məsuliyyətli olmağa, Cenevrə Konvensiyasının normalarını yerinə yetirməyə və erməni əsirləri geri qaytarmağa çağırıb.

Eurasia Diary "Sputnik Armeniya"ya istinadla xəbər verir ki, erməni millət vəkili bununla da Beynəlxalq Qırmızı Xaç Komitəsinin Azərbaycandakı məsul təşkilatlardan biri olduğunu deyən azərbaycanlı həmkarı Vüqar Seyidova öz aləmində cavab verib. Vardanyan, Qırmızı Xaçın Cenevrə Konvensiyasının normalarına riayət olunması məsələsini dəfələrlə qaldırdığını və bu normaların Azərbaycan da daxil olmaqla hər kəs üçün məcburi olduğunu, döyüş əməliyyatları dayandırıldıqdan sonra bütün əsirlər vətənlərinə qaytarılmalı olduğunu deyib.

Amma erməni deputat hazırda Azərbaycan tərəfində olan erməni əsilli şəxslərin böyük əksəriyyətinin döyüş əməliyyatları zamanı deyil, Azərbaycan, Rusiya və Ermənistan rəhbərlərinin döyüşlərin dayandırılması barədə imzaladığı 9 noyabr razılaşmasından sonra əsir düşdüklərini xatırlatmağı unudub. Belə ki, hərbi əməliyyatlar başa çatandan sonra müxtəlif yollarla Azərbaycan ərazisinə sızan və “partizanlıq” etməyə çalışan erməni hərbçiləri hazırda hərbi əsir kimi deyil, ancaq başqa dövlətin ərazisində terror və diversiya ilə məşğul olan terrorçular kimi nəzərdən keçirilə bilər. Beynəlxalq qanunlara görə isə terrorçular mütləq məhkəmə qarşısına çıxarılaraq layiq olduqları cəzanı almalıdırlar.

Bu şəxslərin geri qaytarılması ancaq Azərbaycan Prezidentinin xoş məramı nəticəsində baş tuta bilər. Buna görə də, erməni deputat AŞPA-dakı azərbaycanlı həmkarına opponentlik etmək, ona irad bildirmək əvəzinə, Ermənistan rəhbərliyini Azərbaycan Prezidentinə yalvarmaq üçün dilə tutmalıdır.