Arutyunyanın qəfil istefasının səbəbi nədir? | Eurasia Diary - ednews.net

28 Sentyabr, Çərşənbə axşamı

Arutyunyanın qəfil istefasının səbəbi nədir?

Siyasət A- A A+

Ermənistanda parlament seçkiləri geridə qalıb. Hazırda baş nazir səlahiyyətlərini icra edən Nikol Paşinyan mövqeyini yenidən gücləndirməyə çalışır. Belə bir məqamda ölkənin müdafiə naziri Vaqarşak Arutyunyanın qəfil istefası ortaya ciddi suallar doğurur. 

Seçkidən sonra Ermənistanda nələr baş verir?  Arutyunyan niyə istefaya məcbur qaldı?

Ermənistanda cərəyan edən son prosesləri şərh edən politoloq Elxan Şahinoğlu bildirib ki, əslində Vaqarşak Arutyunyan hərbi rütbəsinə və nazir postuna görə Nikol Paşinyana minnətdar olmalı idi:

“Çünki Arutunyan Ermənistanın 1999-2000-ci illərdə nazir postunu tutmuş və eks-prezident Robert Köçəryan onu bu vəzifədən ağır ittihamlarla qovmuşdu. Paşinyan 2020-ci ildə Arutunyana rütbəsini qaytararaq onu özünə hərbi müşavir vəzifəsinə təyin etdi. Arutunyan müharibədə məğlubiyyətdən sonra nazir təyin edildi. Əgər Arutunyan məğlubiyyətə şərik olmaq istəmirdisə, elə o zaman nazir vəzifəsindən imtina etməliydi. Etmədi və məğlubiyyətə şərik oldu. Əksinə Arutunyan qiyamçı baş qərargah rəisi Onik Qasparyanın sakitcə kreslosunu boşaltmaqda Paşinyana yardım etdi və bununla hərbi çevrilişin qarşısını aldı”.

Azərbaycanın Ermənistanla sərhədə nəzarəti gücləndirdiyini vurğulayan E. Şahinoğlu əlavə edib ki, Ordumuz atəşə daha artıq atəşlə cavab verir:

“Ermənistan ordusu Azərbaycan sərhədçilərini Qara göldən uzaqlaşdırmağa risq etmədi, növbəti toqquşmadan qorxdu. Müharibədə məğlubiyyətdən sonrakı hadisələr də Ermənistan ordusunun nüfuzunu aşağı salmaqdadır. Vaqarşak Arutyunyan özü bacarmadığını Rusiya hərbçilərinin əli ilə etməyə çalışdı, ancaq bu da alınmadı, Moskva sərhədin müəyyənləşməsinə qarışmaq istəmədi. Bu vəziyyətdə Vaqarşak Arutyunyan istefaya üstünlük verdi. Onun ya Təhlükəsizlik Şurasının katibi, ya da Ermənistanın Rusiyadakı səfiri vəzifəsinə təyin olunacağı ehtimalları var.

Beləliklə, Nikol Paşinyan yeni müdafiə naziri tapmalıdır. Ermənistan üçün indiki ağır vəziyyətdə generallar arasında müdafiə naziri olmaq istəyənlərin sayı çox deyil”.

Xatırladaq ki, Ermənistanın müdafiə naziri səlahiyyətlərini icra edən Vaqarşak Arutyunyan bir neçə gün əvvəl vəzifəsindən istefa verib. Onun hansı səbəbdən istefaya getdiyi açıqlanmayıb.

Modern.az

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...