Türk Şurasının XİN başçılarının xüsusi iclasında Vətən müharibəsi şəhidləri anılıb | Eurasia Diary - ednews.net

20 Oktyabr, Çərşənbə

Türk Şurasının XİN başçılarının xüsusi iclasında Vətən müharibəsi şəhidləri anılıb

Siyasət A- A A+

Türkdilli Dövlətlərin Əməkdaşlıq Şurasının (Türk Şurası) İstanbulda keçirilən Xarici İşlər Nazirləri Şurasının xüsusi iclasında Vətən müharibəsi şəhidlərinin xatirəsi bir dəqiqəlik sükutla anılıb.

Azərbaycan Xarici İşlər Nazirliyinin (XİN) Mətbuat xidməti idarəsindən EDNews.net-ə verilən xəbərə görə, xüsusi iclas Əfqanıstandakı vəziyyət və onun Türk Şurasının üzv dövlətlərinə təsirinin müzakirə edilməsi məqsədilə çağırılıb və iclasa Türk Şurasının Fəaliyyətdə olan Sədri, Azərbaycan Respublikasının xarici işlər naziri Ceyhun Bayramov sədrlik edib.

Ceyhun Bayramov xüsusi iclasın Azərbaycan üçün əlamətdar bir günə təsadüf etdiyini, bu gün Azərbaycan xalqının Ermənistanın hərbi təcavüzünə qarşı ölkənin suverenliyi və ərazi bütövlüyü uğrunda mübarizədə qurban getmiş qəhrəman oğul və qızlarının xatirəsinə Anım günü kimi qeyd edildiyini vurğulayıb.

Nazir 27 sentyabr 2020-ci il tarixinin Azərbaycan tarixində dönüş nöqtəsi olduğunu, həmin gün Ermənistanın növbəti hərbi təcavüz aktına cavab olaraq Azərbaycanın öz ərazi bütövlüyü və suverenliyini qorumaq, mülki əhalinin təhlükəsizliyini təmin etmək üçün haqq mübarizəsinə başladığını qeyd edib. 44 gün davam etmiş Vətən müharibəsində Azərbaycan xalqı, Azərbaycan Silahlı Qüvvələri və Ali Baş Komandanın bir dəmir yumruq kimi birlik nümayiş etdirərək 30 ilə yaxın işğal altında qalmış ərazilərimizi azad etdiyi diqqətə çatdırılıb.

Ceyhun Bayramov qeyd edib ki, Vətən müharibəsində əldə edilmiş qələbə beynəlxalq hüquq və ədalətin təntənəsidir, bu qələbə nəticəsində Ermənistanın illər ərzində Azərbaycan və dünya ictimaiyyətinə qəbul etdirmək istədiyi qanunsuzluğa son qoyulub.

Ceyhun Bayramov Türk Şurası və üzv dövlətlərin Azərbaycanın haqlı mövqeyinə davamlı olaraq dəstək verərək prinsipial mövqe nümayiş etdirdiyini xatırladıb və buna görə təşəkkür edib.

Daha sonra Azərbaycan Respublikasının suverenliyi və ərazi bütövlüyü uğrunda şəhid olanların əziz xatirəsi bir dəqiqəlik sükutla yad edilib.

Şəhidlərin xatirəsi anıldıqdan sonra iclas öz işini Türkiyənin xarici işlər naziri Mevlüt Çavuşoğlunun açılış nitqi ilə davam etdirib.

Müzakirələrin yekununda nazirlər şurasının bəyanatı qəbul edilib.

İclasda, həmçinin Türk Şurasının cari ilin noyabr ayında təşkil olunacaq Sammitinə hazırlıq məsələləri, habelə təşkilatın gündəliyində duran digər məsələlər ətrafında fikir mübadiləsi aparılıb.

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...