“Xəbər proqramlarında izlədiyimiz Suriya, İraq və Livandakı müharibələr bizə çox uzaq görünürdü. Sonrasında bu müharibə faciəsinin, yalnız 2020-ci ilin payızında qapımızı döyə biləcəyi məlum oldu. Dünya, həqiqətən də, həm yaxşı, həm də pis mənada daha qlobal, daha çox bağlı və birləşmiş hala gəlib. Kiçik və uğursuz dövlətlər getdikcə daha güclülərdən asılı olur. Ölkəmiz kimi...”
EDNews.net Yenisabah.az-a istinadən xəbər verir ki, bu barədə “Hraparak” nəşri yazıb.
Erməni nəşri mövzunu belə davam etdirib:
“Təəssürat belədir ki, biz artıq dövlətimizin, millətimizin və hətta fərdimizin taleyini həll etmirik, ya da etmək istəmirik. Üstəlik, ölkəmiz daxilində qərar verilmir. Fərqli kabinetlərdə oturan bəzi yaxşı və pis "dayılar" Ermənistanın və erməni xalqının başına nə gəlməli olduğuna qərar verirlər. Bunun fonunda Ermənistanda qəbul edilən qərarlarda, cəmiyyətimizin böyük əksəriyyəti iştirak etsə belə, seçkilər və bunun nəticəsində formalaşan hakimiyyət heç bir şey ifadə etmir. Onlar yalnız uzaq instansiyalarda verilən qərarlara cavabdehdirlər.
Bu səbəbdən insanlar beynəlxalq hadisələrə, geosiyasi vəziyyətə, digər ölkələrin bizə münasibətinin dəyişməsinə daha çox maraq göstərdilər. Vladimir Putinin Ermənistan haqqında nə düşündüyü, Co Bayden çıxışında Ermənistan haqqında danışması, Makronun Fransa ermənilərinin ənənəvi şam yeməyinə qatılıb-qatılmayacağı “yuxarıda” oturanlar üçün Milli Məclisin gələn həftə qəbul edəcəyi yeni anti-demokratik qanundan daha vacibdir”.
