Yanvarın 20-də Ermənistan Təhlükəsizlik Şurasının katibi Armen Qriqonyan jurnalistlərə açıqlamasında bildirib ki, sülh müqaviləsinin hazırlanması üzərində işi davam etdirəcəklər.
“Bunun üçün biz Qarabağ probleminin danışıqlar və siyasi mexanizmlər yolu ilə və ATƏT-in Minsk Qrupu həmsədrlərinin üçlüyü çərçivəsində həllini tapmalıyıq”.
Məsələ ilə bağlı EDNews-a açıqlama verən Azərbaycan Respublikasının Milli Məclisinin deputatı Asim Mollazadə qeyd edib ki, Ermənistan hakimiyyəti mütləq Qarabağ məsələsini bir kənara qoyub Azərbaycan ilə sülh sazişi üzərində işləməlidir.
“Ermənistan artıq Qarabağ münaqişəsinin bitdiyini başa düşməlidir. Rəsmi İrəvan anlamalıdır ki, Azərbaycan ilə sülh danışıqlarına qatılmağın zamanı gəlib. Ermənistan hakimiyyəti mütləq şəkildə Azərbaycan ilə sülh sazişi üzərində işləməlidir. Bununla bərabər, Ermənistan Azərbaycanla sərhədlərin delimitasiya və demarkasiya olunması, o cümlədən Zəngəzur dəhlizinin açılması ilə bağlı öhdəliklərini yerinə yetirməlidir. Ermənistan bu öhdəlikləri yerinə yetirdiyi halda normal dövlətə çevrilə və qonşuları ilə əməkdaşlıq edə bilər”.
Qarabağda Qərb ilə əməkdaşlığa gəlincə isə deputat Azərbaycanın Avropa İttifaqı və ATƏT ilə bu bölgədə bir çox sahələrdə əməkdaşlığa hazır olduğunu qeyd edib.
“Qarabağda Azərbaycan həm Avropa İttifaqı, həm də ATƏT ilə bir çox sahələrdə əməkdaşlığa hazırdır. Ən azından bu təşkilatlar məcburi köçkünlərin öz yurd -yuvalarına qayıtmasını təmin edən dəstək proqramları üzərində işləyə bilərlər. Azad edilən torpaqlarda minaların təmizlənməsi və infrastrukturun qurulması işlərinə, həmçinin buna bənzər humanitar məsələlərdə yer ala bilərlər”.
Sonda Asim Mollazadə Minsk Qrupunun Ermənistan və Azərbaycan arasında sülh prosesinin sürətləndirilməsi üçün heç bir təklif irəli sürə bilməyəcəyini vurğulayıb.
“Ümumiyyətlə, Minsk Qrupunun Ermənistan və Azərbaycan arasında diplomatik əlaqələrin qurulması üçün heç bir təklifi yoxdur. Hesab edirəm ki, bu məsələ ilə bağlı Ermənistan və Azərbaycan özləri danışıqlar keçirə bilərlər. Minsk Qrupu 30 ildə vasitəçi kimi heç bir nailiyyət ortalığa qoymadı. Bundan sonra da hər hansı təklif irəli sürməsi inandırıcı deyil. Bunu da nəzərə almaq lazımdır ki, Azərbaycanın özü BMT Təhlükəsizlik Şurasının dörd qətnaməsini yerinə yetirib. Minsk Qrupunun bacarmadığını Azərbaycanın özü icra etdi”.
Xatırladaq ki, Azərbaycan Respublikasının Prezidenti İlham Əliyev çıxışlarında dəfələrlə Qarabağ münaqişəsinin bitdiyini və Qarabağ məsələsinin artıq müzakirə mövzusu olmadığını bildirib. Eyni zamanda, Prezident 2021-ci ilin çıxışlarının birində ATƏT-in Minsk Qrupunu Ermənistan-Azərbaycan münasibətlərinin normallaşması ilə bağlı təkliflər verməyə çağırıb.
Yunis Abdullayev