Türkiyədə ulduz müğənnilərdən sayılan Sezen Aksunun ətrafında dolaşan qalmaqal hələ də gündəmi zəbt etməkdədir. İslam dininə və dünya müsəlmanlarının dini inancına toxunan, ifası ilə cəmiyyətin bir hissəsinin nifrətini öz üzərinə çəkən müğənni, hətta Türkiyə prezidenti Rəcəb Tayyib Ərdoğanın kəskin tənqid hədəfinə tuş gəlib. Prezident Ərdoğan müğənninin ünvanına “uzanan dilləri kəsmək bizim görəvimizdir” deyərək ona ismarıc yollayıb.
Maraqlısı isə müğənninin “Şahane Bir Şey Yaşamak” adlı çıxardığı mahnısı 2017-ci ildə işıq üzü görməsinə baxmayaraq, İslam dinində ilk peyğəmbəri olan Adəm və həyat yoldaşı Həvvanı cahil adlandırdıği bu musiqisinin bu günlərdə gündəmə gəlməsi olub. Üzərindən beş il keçməsinə baxmayaraq mahnı son günlər Türkiyədə dindar kəsim və iqtidar tərəfdarlarını son dərəcə qıcıqlandırıb.
Bunun səbəb isə Türkiyədə qalmaqal xoşlayan trol və sosial şəbəkə azarkeşlərinin olduğu ortaya çıxıb. Sosial şəbəkədə qabardılan bu məsələ son məqamda siyasi səviyyəyə çatdırılıb.
Bəs türkiyəli Sezen Aksu nəyə və kimlərə pərəstiş edir?
67 yaşlı müğənni Sezen Aksu mahnıları ilə milyonların qəbinə yol açsa da, bu dəfə nədənsə türk millətinin nifrətini qazanıb. Aksunun hədəfə gəlməsi həm də onun bir növ ermənipərəst ifadələri ilə də üst-üstə düşür. 2012-ci ildə Azərbaycanın mədəni irsinə aid “Sarı Gəlin” xalq mahnısını ermənicə oxuyan müğənni bir növ öz erməni sevdasını Türkiyə ictimaiyyətində sərgiləyib. Bu bir tərəfdən normal idi. Çünki müğənni 21 il Türkiyədə tanınan erməni əsilli musiqiçi Onno Tunçun sevgilisi olub. Hətta Sezen Aksu verdiyi konsertlərdən birində “Biz bütün ermənilərlə akrabayız,” deyə ifadə işlədib.
EDNews, baş verənlərin siyasi tərəflərini öyrənmək üçün siyasi analitik, professor İrfan Kaya Ülgərlə söhbətləşib. Professor Ülgər məsələnin prezident səviyyəsinə çatdırılmasının bəzi məqamlarını izah edib.
“Burada iki əsas məqamı göstərmək istərdim: birincisi ölkə başçısı Ərdoğanın bu cür məsələlərə son dərəcə həssas yanaşmasıdır. Çünki Ərdoğan digər tənqidlərə hər zaman hüquqi nöqteyi nəzərdən yanaşıb.
İkinci məsələ müxalifətin Ərdoğanın bu həssasiyyıtindən öz yararına istifadə etməsidir. Bu ikinci ən əsas məqamdır. Bilirsiniz ki, son zamanlar müxalifət hər sahəyə baş vuraraq AKP-ni tənqid etməyə çalışır və bunun üçün bəhanə olan mövzular axtarır. Prezident Ərdoğanı bir müğənni ilə gündəmə gətirməyin ən mümkün olan yolu məhz dini məsələ ola bilərdi”.
Professor həmçinin Ərdoğanın reaksiyası ilə bağlı ictimaiyytin rəyinə də toxunub.
“Artıq hər şey göz önündədir. Bəllidir ki, bəziləri yenə gündəmi qarışdırmaq üçün müxalifətin alətinə çevrilib. Bu səbəbdən də hazırda Türkiyə ictimaiyyəti Ərdoğanın islami yanaşmasını ciddi şəkildə müdafiə edir. Müxalifətə gəlincə isə, hesab edirəm bu onların ənənəvi üsüludur və bu kimi hallara Türkiyə artıq alışıb”.
Elnur Ənvəroğlu