Vətəndaş və İnkişaf Partiyasının sədri Əli Əliyevin Müdafiə Komitəsinin yaydığı bəyanata imza atan partiyalar arasında AXCP sədri Əli Kərimli və Haqq Ədalət Partiyasının sədri Əli İnsanov təmsil olunmaq istəməyib.
Ednews əldə etdiyi məlumata görə, təşkil olunan müzakirələrdə bu iki partiya Komitədə iştirak etməyib. Qeyd olunur ki, komitədə bir çox partiyalar Vətəndaş və İnkişaf Partiyasının başqanının müdafiəsi üçün bəyanata imza atıb. İddiaya görə, Əli Əliyevin müdafiəsində Əli İnsanov və Əli Kərimli geri addım ataraq bu fikirdən vaz keçiblər.
Məsələ ilə bağlı AXCP-nin sədr müavini Seymur Həzi Ednews-a deyib ki, yayılan iddialar boş cəfəngiyyatdır. Onun sözlərinə görə Müdafiə Komitəsində Xalq Cəbhəsi Partiyasını bir şəxs təmsil edir. Əli Kərimli isə iclaslara qatılmaq imkanı olmadığı üçün komitəyə gedə bilməyib.
“Bütün partiyanı Fuad Qəhrəmanlı təmsil edir. Əli Əliyevi müdafiə etmək istəməsək Komitədə iştirak etməzdik. Fuad Qəhrəmanlı oraya partiyanın qərarı və rəhbərinin göstərişi ilə qatılıb”.
Sabiq səhiyyə naziri Əli İnsanovun qurucusu və sədri olduğu Haqq və Ədalət Partiyasının Ali Məclis sədri Zəlimxan Məmmədli də iddiaları yalanlayıb. O, məsələ ilə bağlı Ednews-a danışarkən bildirib ki, şəxsən özü komitədə təmsilçidir.
“İdarə Heyətinin qərarı ilə həmçinin sədrin müavini İsgəndər Vahabzadə də partiyanı Müdafiə Komitəsində təmsil edir. Biz Əli Əliyevin həbsi ilə bağlı bəyanat vermişik. Bundan başqa gündəlik müsahibələrimizdə onunla bağlı mövqeyimizi hər zaman dilə gətiririk. Ona görə burada heç bir problem yoxdur”.
Qeyd edək ki, 2021-ci il noyabrın 30-da qəzaya uğrayan Dövlət Sərhəd Xidmətinə (DSX) məxsus “Mi-17” tipli helikopterdə sağ qalan polkovnik-leytenant Emil Cəfərov və kapitan Ramin Ədilov Vətəndaş və İnkişaf Partiyasının (VİP) sədri Əli Əliyevə qarşı Azərbaycan Respublikası Cinayət Məcəlləsinin 147.1-ci (böhtan) maddəsinə uyğun olaraq xüsusi ittiham qaydasında şikayət veriblər.
Bununla bağlı Yasamal Rayon Məhkəməsində barəsində cinayət işi üzrə məhkəmə prosesi keçirilib və Əli Əliyev təqsirli bilinərək hökmə əsasən 5 ay müddətinə həbs edilib.